Yaponiyaning Kyoto prefekturasidagi Yavata shahri meri Shoko Kavata mamalakat tarixida lavozimda ishlab turib tug‘ruq ta’tiliga chiqqan ilk mer bo‘lishi kutilmoqda. Bu haqda CNN ma’lumot berdi.
Xabarda qayd etilishicha, 35 yoshli mer sentyabr oyida ilk farzandini dunyoga keltiradi. U tug‘ruqdan oldin 6 hafta va tug‘ruqdan keyin 8 hafta ta’til olishni rejalashtirgan. Uning vazifalarini bu davrda mer o‘rinbosari bajaradi.
Kavataning qarori Yaponiyada katta muhokamalarga sabab bo‘ldi. Mamalakat qonunchiligida saylangan amaldorlar uchun tug‘ruq yoki ota-onalik ta’tilini tartibga soluvchi alohida huquqiy mexanizm mavjud emas.
Mernining aytishicha, u rahbarlik lavozimlaridagi ayollar ham oila va ish o‘rtasida muvozanatni saqlashi mumkinligini ko‘rsatishni istaydi. Uning fikricha, bu boshqa ayollarni ham yuqori lavozimlarga intilishga ruhlantirishi mumkin.
