Япониянинг Киото префектурасидаги Явата шаҳри мери Шоко Кавата мамлакат тарихида лавозимда ишлаб туриб туғруқ таътилига чиққан илк мер бўлиши кутилмоқда. Бу ҳақда CNN маълумот берди.
Хабарда қайд этилишича, 35 ёшли мер сентябрь ойида илк фарзандини дунёга келтиради. У туғруқдан олдин 6 ҳафта ва туғруқдан кейин 8 ҳафта таътил олишни режалаштирган. Унинг вазифаларини бу даврда мер ўринбосари бажаради.
Каватанинг қарори Японияда катта муҳокамаларга сабаб бўлди. Мамлакат қонунчилигида сайланган амалдорлар учун туғруқ ёки ота-оналик таътилини тартибга солувчи алоҳида ҳуқуқий механизм мавжуд эмас.
Мернинг айтишича, у раҳбарлик лавозимларидаги аёллар ҳам оила ва иш ўртасида мувозанатни сақлаши мумкинлигини кўрсатишни истайди. Унинг фикрича, бу бошқа аёлларни ҳам юқори лавозимларга интилишга руҳлантириши мумкин.
