O‘zbekiston prezidenti Shavkat Mirziyoyev AQSh prezidenti Donald Trampga tavallud kuni munosabati bilan tabrik yo‘lladi.
Davlat rahbari o‘z maktubida Trampni boy siyosiy tajribaga ega, xalq hurmatiga sazovor davlat arbobi sifatida e’tirof etgan. Shuningdek, uning qat’iy siyosiy yetakchiligi tufayli AQShning xalqaro maydondagi nufuzi va qudrati mustahkamlanib borayotganini ta’kidlagan.
Tabrikda O‘zbekiston va AQSh o‘rtasidagi munosabatlar so‘nggi yillarda izchil rivojlanib, o‘zaro hurmat, ishonch va mushtarak manfaatlar asosida yangi bosqichga ko‘tarilayotgani qayd etilgan.
“Bugun O‘zbekiston — AQSh aloqalari har qachongidan ham mustahkam va amaliy ruh kasb etmoqda”, — deyiladi maktubda.
Prezident O‘zbekiston AQSh bilan ko‘p qirrali va strategik sheriklik munosabatlarini yanada chuqurlashtirishdan manfaatdor ekanini bildirgan. Xususan, savdo-iqtisodiy va investitsiyaviy hamkorlikni yangi bosqichga olib chiqish muhim vazifalardan biri sifatida qayd etilgan.
Shavkat Mirziyoyev Donald Trampning xalqaro maydonda tinchlik va barqarorlikni ta’minlashga qaratilgan sa’y-harakatlarini yuqori baholashini ham ta’kidlagan.
Shuningdek, strategik sheriklikning istiqbolli yo‘nalishlarini muhokama qilish maqsadida Tramp O‘zbekistonga tarixiy tashrif bilan kelishga taklif etilgan.
Maktub yakunida Donald Trampga mustahkam sog‘liq, oilaviy baxt va davlatchilik faoliyatida muvaffaqiyatlar, Amerika xalqiga esa tinchlik va farovonlik tilab qolingan.
