Ўзбекистон президенти Шавкат Мирзиёев АҚШ президенти Дональд Трампга таваллуд куни муносабати билан табрик йўллади.
Давлат раҳбари ўз мактубида Трампни бой сиёсий тажрибага эга, халқ ҳурматига сазовор давлат арбоби сифатида эътироф этган. Шунингдек, унинг қатъий сиёсий етакчилиги туфайли АҚШнинг халқаро майдондаги нуфузи ва қудрати мустаҳкамланиб бораётганини таъкидлаган.
Табрикда Ўзбекистон ва АҚШ ўртасидаги муносабатлар сўнгги йилларда изчил ривожланиб, ўзаро ҳурмат, ишонч ва муштарак манфаатлар асосида янги босқичга кўтарилаётгани қайд этилган.
“Бугун Ўзбекистон — АҚШ алоқалари ҳар қачонгидан ҳам мустаҳкам ва амалий руҳ касб этмоқда”, — дейилади мактубда.
Президент Ўзбекистон АҚШ билан кўп қиррали ва стратегик шериклик муносабатларини янада чуқурлаштиришдан манфаатдор эканини билдирган. Хусусан, савдо-иқтисодий ва инвестициявий ҳамкорликни янги босқичга олиб чиқиш муҳим вазифалардан бири сифатида қайд этилган.
Шавкат Мирзиёев Дональд Трампнинг халқаро майдонда тинчлик ва барқарорликни таъминлашга қаратилган саъй-ҳаракатларини юқори баҳолашини ҳам таъкидлаган.
Шунингдек, стратегик шерикликнинг истиқболли йўналишларини муҳокама қилиш мақсадида Трамп Ўзбекистонга тарихий ташриф билан келишга таклиф этилган.
Мактуб якунида Дональд Трампга мустаҳкам соғлиқ, оилавий бахт ва давлатчилик фаолиятида муваффақиятлар, Америка халқига эса тинчлик ва фаровонлик тилаб қолинган.
