O'zbekiston Prezidenti Shavkat Mirziyoyev Toshkent shahrida qisqa muddat to'xtab o'tgan Malayziya Bosh vaziri Anvar Ibrohim bilan uchrashuv o'tkazdi. Bu haqda Prezident matbuot xizmati xabar berdi.
Ma'lum qilinishicha, muloqot chog'ida O'zbekiston va Malayziya o'rtasidagi ikki tomonlama munosabatlarni yanada rivojlantirish hamda amaliy hamkorlikni kengaytirish masalalari muhokama qilingan.
Qayd etilishicha, oliy darajadagi o'zaro tashriflar natijasida ikki davlat o'rtasidagi hamkorlik yangi bosqichga chiqqan. Joriy yil boshidan buyon o'zaro tovar ayirbosh qilish hajmi 15 foizga oshgan, qo'shma korxonalar soni esa 50 taga yetgan.
Uchrashuvda Malayziyaning "Petronas" korporatsiyasi delegatsiyasi bilan o'tkazilayotgan muzokaralar ahamiyatiga alohida e'tibor qaratilgan. Tomonlar neft-kimyo, yuqori texnologiyalar, qishloq xo'jaligi, mashinasozlik va farmatsevtika sohalaridagi strategik loyihalarni jadallashtirish masalalarini ko'rib chiqqan.
Shuningdek, islom moliyasi, hududlararo hamkorlik, ziyorat turizmi, to'g'ridan-to'g'ri aviaqatnovlar sonini ko'paytirish va madaniy almashinuvlarni rivojlantirish istiqbollari ham muhokama qilingan.
Suhbat davomida xalqaro va mintaqaviy kun tartibidagi dolzarb masalalar yuzasidan ham fikr almashilgan.
Uchrashuv yakunida Prezident Shavkat Mirziyoyev Malayziya Bosh vaziri Anvar Ibrohimni O'zbekistonga rasmiy tashrif bilan kelishga taklif qildi.
