Ўзбекистон Президенти Шавкат Мирзиёев Тошкент шаҳрида қисқа муддат тўхтаб ўтган Малайзия Бош вазири Анвар Иброҳим билан учрашув ўтказди. Бу ҳақда Президент матбуот хизмати хабар берди.
Маълум қилинишича, мулоқот чоғида Ўзбекистон ва Малайзия ўртасидаги икки томонлама муносабатларни янада ривожлантириш ҳамда амалий ҳамкорликни кенгайтириш масалалари муҳокама қилинган.
Қайд этилишича, олий даражадаги ўзаро ташрифлар натижасида икки давлат ўртасидаги ҳамкорлик янги босқичга чиққан. Жорий йил бошидан буён ўзаро товар айирбошлаш ҳажми 15 фоизга ошган, қўшма корхоналар сони эса 50 тага етган.
Учрашувда Малайзиянинг "Petronas" корпорацияси делегацияси билан ўтказилаётган музокаралар аҳамиятига алоҳида эътибор қаратилган. Томонлар нефть-кимё, юқори технологиялар, қишлоқ хўжалиги, машинасозлик ва фармацевтика соҳаларидаги стратегик лойиҳаларни жадаллаштириш масалаларини кўриб чиққан.
Шунингдек, ислом молияси, ҳудудлараро ҳамкорлик, зиёрат туризми, тўғридан-тўғри авиақатновлар сонини кўпайтириш ва маданий алмашинувларни ривожлантириш истиқболлари ҳам муҳокама қилинган.
Суҳбат давомида халқаро ва минтақавий кун тартибидаги долзарб масалалар юзасидан ҳам фикр алмашилган.
Учрашув якунида Президент Шавкат Мирзиёев Малайзия Бош вазири Анвар Иброҳимни Ўзбекистонга расмий ташриф билан келишга таклиф қилди.
