Namangan viloyatida o‘tkazilgan tezkor tadbir davomida qo‘shni davlatdan noqonuniy yo‘llar orqali olib kirilgan qariyb 4 kilogramm gashish musodara qilindi. Bu haqda Davlat xavfsizlik xizmati xabar berdi.
Ma’lum qilinishicha, DXXning Namangan viloyati bo‘yicha boshqarmasi hamda viloyat Bojxona boshqarmasi xodimlari hamkorligida o‘tkazilgan tadbirda "Toshkent — Namangan" yo‘nalishida harakatlanayotgan Cobalt rusumli avtomashina Pop tumanidagi "Namangan" YPH maskanida to‘xtatilib, ko‘zdan kechirildi.
Tekshiruv davomida avtomashinada yo‘lovchi sifatida ketayotgan, Namangan shahrida yashovchi, 1989 yilda tug‘ilgan va muqaddam sudlangan shaxsga tegishli sumkadan 3 kilogramm 956 gramm gashish aniqlanib, ashyoviy dalil sifatida rasmiylashtirib olindi.
Tergovga qadar tekshiruvda ushbu giyohvandlik vositasi yana bir 1989 yilda tug‘ilgan, muqaddam sudlangan hamshahari bilan til biriktirgan holda qo‘shni davlatdan aylanma yo‘llar orqali olib kirilgani aniqlangan. Mazkur shaxs ham protsessual tartibda ushlandi.
Holat yuzasidan jinoyat ishi qo‘zg‘atilib, tergov harakatlari olib borilmoqda.
