Наманган вилоятида ўтказилган тезкор тадбир давомида қўшни давлатдан ноқонуний йўллар орқали олиб кирилган қарийб 4 килограмм гашиш мусодара қилинди. Бу ҳақда Давлат хавфсизлик хизмати хабар берди.
Маълум қилинишича, ДХХнинг Наманган вилояти бўйича бошқармаси ҳамда вилоят Божхона бошқармаси ходимлари ҳамкорлигида ўтказилган тадбирда "Тошкент — Наманган" йўналишида ҳаракатланаётган Cobalt русумли автомашина Поп туманидаги "Наманган" ЙПХ масканида тўхтатилиб, кўздан кечирилди.
Текширув давомида автомашинада йўловчи сифатида кетаётган, Наманган шаҳрида яшовчи, 1989 йилда туғилган ва муқаддам судланган шахсга тегишли сумкадан 3 килограмм 956 грамм гашиш аниқланиб, ашёвий далил сифатида расмийлаштириб олинди.
Терговга қадар текширувда ушбу гиёҳвандлик воситаси яна бир 1989 йилда туғилган, муқаддам судланган ҳамшаҳари билан тил бириктирган ҳолда қўшни давлатдан айланма йўллар орқали олиб кирилгани аниқланган. Мазкур шахс ҳам процессуал тартибда ушланди.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
