Bugun, 24 iyun kuni Andijon shahrining 2026 yilda “Turkiy dunyoning madaniyat poytaxti” deb e’lon qilinishi munosabati bilan xalqaro tadbirlar ochilish marosimi bo‘lib o‘tdi. Shu munosabat bilan O‘zbekiston Respublikasi Prezidenti Shavkat Mirziyoyev tadbir ishtirokchilariga tabrik yo‘lladi.
Davlat rahbari o‘z murojaatida Andijon shahrining mazkur maqomga munosib ko‘rilganini O‘zbekistonning boy tarixi, madaniy-ma’naviy merosi va turkiy sivilizatsiya taraqqiyotiga qo‘shgan hissasining xalqaro miqyosdagi e’tirofi sifatida baholadi.
Prezident tabrigida Andijon asrlar davomida madaniyat, adabiyot, san’at va hunarmandchilik markazlaridan biri bo‘lib kelganini ta’kidladi. Qayd etilishicha, ushbu zamindan Zahiriddin Muhammad Bobur, Abdulhamid Cho‘lpon kabi buyuk davlat arboblari va ijodkorlar yetishib chiqqan.
Shuningdek, milliy madaniyatning ajralmas qismiga aylangan “Andijon polkasi” raqsi hamda askiya san’ati nafaqat O‘zbekiston, balki butun turkiy olamning umumiy ma’naviy boyligi sifatida e’tirof etildi.
Murojaatda O‘zbekiston va Xalqaro turkiy madaniyat tashkiloti — TURKSOY o‘rtasidagi hamkorlik alohida qayd etildi. Xususan, turkiy xalqlarning eng sara adabiy merosini jamlagan 100 jildlik “Turkiy adabiyot durdonalari” to‘plamining nashr etilgani, joriy yil aprel oyida Toshkent shahridagi Islom sivilizatsiyasi markazida TURKSOY vakolatxonasi ochilgani eslatib o‘tildi.
Prezidentning ta’kidlashicha, “Andijon — Turkiy dunyoning madaniyat poytaxti” loyihasi doirasida bir yil davomida o‘tkaziladigan festivallar, ilmiy anjumanlar, ijodiy uchrashuvlar va madaniy tadbirlar qardosh xalqlar o‘rtasidagi do‘stlik rishtalarini yanada mustahkamlashga xizmat qiladi.
So‘z yakunida davlat rahbari tadbir ishtirokchilarini yana bir bor qutlab, ularga mustahkam sog‘liq va kelgusi faoliyatida muvaffaqiyat tiladi hamda mehmonlarni “O‘zbekiston durdonasi, oltin vodi gavhari” deb ta’riflangan Andijon shahriga xush kelibsizlar, deb qarshi oldi.
