Andijon viloyatida yashovchi 24 yoshli fuqaro Rossiya–Ukraina urushida yollanma jangchi sifatida ishtirok etgani uchun sud hukmi bilan ozodlikdan mahrum qilindi. Bu haqda sud materiallariga tayanib xabar berilmoqda.
Tergov maʼlumotlariga koʻra, mazkur fuqaro 2023 yil yanvar oyida ish izlab Rossiyaga ketgan. Oradan bir yil oʻtib u moliyaviy qiyinchiliklar sabab harbiy xizmat boʻyicha shartnoma imzolagan. Unga bir martalik 745 ming rubl va har oylik 204 ming rubl miqdorida toʻlov vaʼda qilingan.
Harbiy tayyorgarlikdan soʻng u Lugansk viloyatiga yuborilgan va u yerda Rossiya tomonida jangovar harakatlarda qatnashgan. Janglardan birida portlash hamda dron zarbasi natijasida uning yelkasi va oyogʻi jarohatlangan. Davolanishdan keyin u Oʻzbekistonga qaytgan. Keyinchalik uning oyogʻidan metall parchasi olib tashlangani aniqlangan.
Sud jarayonida ayblanuvchi oʻz aybiga toʻliq iqror boʻlib, bu qadamni moliyaviy muammolar tufayli qoʻyganini bildirgan.
Sud uni Jinoyat kodeksining 154-moddasi 1-qismi (yollanish) bilan aybdor deb topdi va 3 yil muddatga ozodlikdan mahrum qilish jazosini tayinladi.
