Yangi yil bayramini munosib kutib olish maqsadida dam olish kunlarining uzaytirilishi, avia va temir yo`l chiptalariga chegirmalar e`lon qilinishi Samarqand viloyatida mahalliy va chet ellik sayyohlar oqimini oshishiga sabab bo`ldi.
Shuningdek, Samarqandga bayram oldi va bayram kunlari: Rossiya, Yaponiya, Afg`oniston, Qozog`iston va boshqa mamlakatlardan sayyohlar tashrif buyurishdi.
2018-yilning 23 dekabrdan 28 dekabrigacha 856 nafar xorijlik sayyoh viloyatdagi mehmonxonalarda ro`yxatdan o`tgan bo`lsa, 2018-yilning 29 dekabridan 2019 yilning 3 yanvariga qadar bo`lgan davrda 1 606 nafar chet ellik sayyoh ro`yxatga olingan.
Bayram kunlari Samarqandga tashrifni amalga oshirgan chet el fuqarolar orasidan Top-3 sifatida: Rossiya (588 nafar), Afg`oniston (198 nafar), Yaponiya (166 nafar)ni keltirish mumkin. Yuqorida keltirilgan raqamlarni ayni o`tgan bayram kunlari davri bilan ya`ni 2017 yil 29 dekabrdan 2018-yil 3 yanvargacha solishtirganda 790 xorijlik fuqaro ro`yxatga olinganligini ko`rishimiz mumkin.
Bu yil viloyatga tashrif buyurgan sayyohlar soni ikki baravarga ko`paygan. Bu haqda Turizmni rivojlantirish davlat qo`mitasi matbuot xizmati xabar berdi.
Eslatib o`tamiz, Tutu.ru sayti rossiyaliklar orasida o`tkazgan tahlil natijalariga ko`ra, yil davomida Evropaga yangi yil chiptalariga bo`lgan talab deyarli 20 foizga kamaygan va birinchi marta eng ko`p sotilgan yo`nalishlar reytingini O`zbekiston boshqara boshlagan.
