Fuqaro Z.K. fuqaro O.dan «Chevrolet cobalt» rusumli avtomashinani avtosalonda ishlovchi tanishlari orqali navbatsiz olib berish evaziga 400 AQSh dollari oldi...
Ammo uning dollarni qo`liga olgan vaqtdagi hursandchiligi uzoqqa cho`zilmadi. U O`zbekiston Respublikasi Bosh prokuraturasi huzuridagi Iqtissodiy jinoyatlarga qarshi kurashish departamentining Jarqo`rg`on tumani bo`limi xodimlari tomonidan o`tkazilgan tezkor tadbirda qo`lga olindi.
Tadbir davomida ushlangan fuqaro Z.K.ning yonida 17 ming 850 AQSh dollari va 773 ming so`m pul mablag`lari borligi aniqlangan. Ushbu holat yuzasidan izoh so`ralganda, u dollarlarni Jarqo`rg`on tumani dehqon bozori atrofida noqonuniy valyuta oldi-sotdisi bilan shug`ullanuvchi notanish shaxslardan har bir AQSh dollarini 8350 so`mdan hisoblab, keyinchalik qayta sotish maqsadida sotib olganligini ma`lum qilgan.
Bosh prokuratura matbuot xizmati xabariga ko`ra, mazkur holat yuzasidan fuqaro Z.K.ga nisbatan jinoyat ishi qo`zg`atilib, tergov harakatlari o`tkazilmoqda.