Халқаро футбол федерацияси (FIFA) коронавирус пандемияси иқтисодий оқибатларини бартараф этиш ва миллий федерацияни қўллаб-қувватлаш мақсадида Қирғизистон футбол уюшмасига 1,5 миллион долларгача ажратади. Бу ҳақда intersport.uz хабар берди.
Шуни таъкидлаш керакки, 1,5 миллион АҚШ доллари миқдоридаги молиявий кўмак ташкилотга аъзо ҳар бир футбол федерациясига берилади.
Қирғизистон футбол федерациясининг хабар қилишича, олинган маблағларнинг бир қисми футбол бўйича мамлакат чемпионатларини қайта тиклашга йўналтирилади.
Футбол ташкилоти матбуот котиби Адилет Керимбековнинг айтишича, пуллар ҳозирча ажратилмаган. Унинг айтишича грант маблағларини олиш учун федерация ариза бериши керак. Маблағлар босқичма-босқич берилади. 500 минг доллар аёллар футбол ривожига берилади. Қолган маблағ (1 млн доллар) федерация ва ижроия қўмита раҳбарлари қарори билан тақсимланади. Пуллар асосан терма жамоаларни ўқитиш ва тренировкаси, премьер-лига ўйинлари ва лига иштирокчилари бўлмиш командаларни қўллаб-қувватлаш учун йўналтирилади. Бир сўз билан айтганда, маблағлар қирғиз футболини сақлаб қолиш ва пандемия оқибатларини юмшатишга йўналтирилади.
