Аввал хабаор берганимиздек, Инновацион ривожланиш вазири Иброҳим Абдураҳмонов Нукус шаҳрида қорақалпоғистонлик ёшлар билан учрашди. Тадбирда ҳудуддаги ўз инновацион, технологик ва ижтимоий лойиҳаларини бошлаган, лойиҳаларини амалга ошириш арафасида турган ва янги ғояларни ҳаётга жорий этишга иштиёқи баланд ёшлар вакиллари иштирок этдилар. Бу ҳақда Вазирлик Матбуот хизмати хабар қилди.
Лойиҳалар муаллифлари ўз ишларини вазирга тақдим этарканлар, уларнинг тайёр ишланмалари, ижтимоий аҳамиятга эга ғоялари амалда қўлланилаётганига эътибор қаратилди. Ушбу ишланмалардан бири «Навбат» электрон иловасининг бета-варианти бўлиб, унинг ёрдамида ҳар қандай ташкилот, муассаса ва объектларига электрон навбат билан рўйхатдан кириш имконияти пайдо бўлади. Бу қулайлик аҳолининг вақтини тежаш билан бир муассасалар учун қаторда ташрифчиларнинг статистикани юритиш, иш режасини тузишда ёрдам беради.
«Қуёш болалари» лойиҳаси эса имконияти чекланган болаларни ижтимоий ҳаётга мослаштириш, уларни меҳнатга ўргатиш, улар учун коррекцион машғулотлар олиб бориш, хусусан, арт-терапия, мусиқа-терапия машғулотларини ўтказишга мўлжалланган. Қувонарлиси, микро-грант ва ўз маблағлари ҳисобига мазкур марказни очиб, ҳозирда болажонлар учун машғулотларни бошлаб юборишган. Даун синдроми, аутизм, нутқий ва руҳий ривожланишда ортда қолиш, дислексия, дисграфия каби касалликларга чалинган болалар мазкур марказда қўшимча таълим олишмоқда.
Инновацион ривожланиш вазири тақдимотларни тинглаб, уларни қўллаб қувватлаш мақсадида Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий маркази ва Ёшлар академияси томонидан ташкил этилган “TechnoWays” технологик ривожланиш марафонининг навбатдаги мавсумини Қорақалпоғистонда ўтказиш таклифини берди. Мазкур марафонда иштирок этган лойиҳалар тажрибали мутахассислар томонидан такомиллаштирилади, марафон ғолибларининг лойиҳалари эса молиялаштирилади.
