Куни кеча Россияда “ЗОЛОТОЙ ВИТЯЗ” XXXII Халқаро кинофоруми якунлари сарҳисоб қилинди. Унда Буюк Британия, Германия, Исроил, Эрон, Австралия, Испания, Канада, Туркия, Украина, Франсия, Аргентина ва бошқа 20 та хорижий мамлакатлардан 165 та картиналар иштирок этди.
Ёш ўзбек киноижодкорларининг филмлари мукофотлар сони бўйича биринчи ўринни эгаллади. Жумладан, кинорежиссёр Фурқат Усмоновнинг “Инсон” ҳужжатли фильми, Умид Искандаровнинг "Саробга йўл" бадиий фильми ва Муниса Магаметнинг "Скотч" қисқа метражли фильмлари ҳакамлар ҳайъатининг махсус мукофотларига сазовор бўлди. Шунингдек, "Скотч" фильми энг яхши дебют фильм сифатида бронза дипломига ҳам сазовор бўлди.
Эслатиб ўтамиз, Кинематография агентлиги буюртмасига биноан суратга олинган, кинорежиссёр Фурқат Усмоновнинг “Инсон” ҳужжатли фильми монолог жанрида ишланган фильм бўлиб, юртимизда инсон қадрига берилаётган эътиборни орамиздаги оддий одамларнинг тақдири орқали тасвирланган. Ушбу фильм 2022 йил ноябр ойида Туркияда бўлиб ўтган “Қўрқут ота “ халқаро кинофестивалида ҳужжатли кино йўналишида олий мукофот – ГРАН-ПРИни қўлга киритган эди.
Муниса Магаметнинг "Скотч" қисқа метражли фильми эса Қозоғистонда бўлиб ўтган “Томирис” ИЙ халқаро кинофестивалида ГРАН-ПРИни қўлга киритган.
"Саробга йўл" бадиий фильми таниқли актёр Умид Искандаровнинг илк режиссёрлик иши бўлиб, ушбу фильмнинг нуфузли кинофорумда мукофотланиши эса таҳсинга лойиқдир.
Эришилган ютуқлар ҳақида Агентлик директори Фирдавс Абдухолиқов шундай дейди: “ - Бу каби мукофотлар ва эътирофларнинг кўпайиши, авваламбор, муҳтарам Президентимизнинг кинематография соҳасига, хусусан, киноижодкорларга бераётган эътибори, яратаётган шароитларининг самараси. Ёш киноижодкорларимизнинг халқаро майдонда танилиб бораётганлиги Янги Ўзбекистоннинг янги кино авлоди ижобий маънода шаклланаётганлигидан далолатдир.”
Россиялик машҳур режиссёр, ҳакамлар ҳаяти раиси Андрей Кончаловский эса “-Бу кўрсаткич ўзбек киносининг янги тўлқини эканлиги айни ҳақиқат”, - дея таъкидлади.
