Ўзбекистонда 2028 йил 1 январдан пенсия ёшини ҳар йили 3 ойга ошириб бориш таклиф этилмоқда. Унга кўра, 2039 йилга келиб эркаклар учун пенсия ёши 63 ёшга, аёллар учун эса 58 ёшга етказилиши мумкин.
Бу ҳақда 15 сентябрь куни жамоатчилик муҳокамасига қўйилган “Аҳоли фаровонлигини таъминлаш ва пенсия таъминоти тизимини ислоҳ қилиш чора-тадбирлари тўғрисида”ги Президент фармони лойиҳасида сўз боради.
Лойиҳада қайд этилишича, бу ўзгариш фуқароларнинг пенсия тизимида иштирок этиши ва пенсия тўловларидан фойдаланиш даври ўртасида мутаносибликни таъминлаш, шунингдек, аҳолининг умр кўриш давомийлиги ортиб бораётганини инобатга олиш мақсадида таклиф этилган.
Ҳужжатга кўра:
-
2027 йил 1 январдан умумий белгиланган пенсия ёшини бир йилга қисқартирган ҳолда пенсия тайинлаш тартиби бекор қилинади;
-
2028 йил 1 январдан пенсия ёши ҳар йили 3 ойга ошириб борилади ва 2039 йилда эркаклар учун 63 ёш, аёллар учун 58 ёш этиб белгиланади.
Пенсия ёшини ошириш даврида пенсияолди ёшидаги фуқаролар учун бир қатор кафолатлар ҳам назарда тутилмоқда.
Жумладан, иш берувчиларга фуқарони пенсияолди ёшида экани сабабли ишдан бўшатиш ёки ишга қабул қилишдан бош тортиш тақиқланади. Ишсиз деб эътироф этилган фуқароларнинг икки йил олдин муддатидан аввал пенсияга чиқиш ҳуқуқи сақланади.
Шунингдек, ерости ишларида, зарарли ва оғир меҳнат шароитларида тўлиқ иш куни давомида ишлайдиган эркаклар 50–55 ёшда, аёллар эса 45–50 ёшда имтиёзли пенсияга чиқиш ҳуқуқини сақлаб қолади.
Пенсия олувчилар учун амалдаги солиқ, транспорт ва соғлиқни сақлаш соҳасидаги имтиёзлар ҳам сақланиши белгиланмоқда.
Бундан ташқари, эркакларга 60 ёшдан, аёлларга эса 55 ёшдан жамғариб бориладиган пенсия маблағларини олиш ҳуқуқини бериш таклиф қилинган.
Иқтисодиёт ва молия вазирлиги 2026 йил 1 декабрга қадар пенсия таъминотига оид қонунлар ҳамда Солиқ кодексига тегишли ўзгартириш ва қўшимчалар киритиш бўйича қонун лойиҳасини Вазирлар Маҳкамасига киритиши белгиланган.
Қайд этиш жоиз, мазкур ўзгаришлар ҳозирча таклиф сифатида илгари сурилган. Фармон лойиҳаси бўйича жамоатчилик муҳокамаси 30 сентябрга қадар давом этади.
