11-12 июль кунлари Андижон шаҳрида автомобилсозлик ва бошқа турли хил ишлаб чиқариш соҳалари учун маҳсулотлар ишлаб чиқаришга ихтисослашган корхоналар учун ихтисослашган ҳудудий тармоқлараро саноат ярмаркаси бўлиб ўтди. Бу ҳақда UzAuto Motors матбуот хизмати хабар бермоқда.
Ярмарка маҳаллий ишлаб чиқарувчи корхоналарни қўллаб-қувватлаш, вилоятнинг йирик саноат ташкилотлари билан маҳаллий саноат корхоналари ўртасида ишлаб чиқариш кооперациясини янада кенгайтиришга қаратилган.
Икки кун давом этган мазкур ярмаркада саноат маҳсулотларини ишлаб чиқарувчи, хусусан вилоятнинг 140 дан ортиқ тадбиркорлик субъектлари вакиллари ўзларининг саноат маҳсулотлари билан қатнашишди. UzAuto Motors компанияси барча саноат маҳсулотларини ишлаб чиқарувчилари қаторида ўзининг ички ва ташқи бозорларда сотиладиган автомобилларнинг барча турларини намойиш этди. Шунингдек, компания стендидан автомобиль эҳтиёт қисмларининг бир қанча турлари ўрин олган.
Саноат ярмаркаси доираси иштирокчилар бир-бирларининг имкониятлари, таклиф ва эҳтиёжлари билан яқиндан танишишлари, ҳамкорлик масалалари бўйича музокаралар олиб боришлари, шунингдек, ҳамкорлик шартномаларини имзолаш имкониятига эга бўлишди.
