Аргентина терма жамоаси билан жаҳон чемпиони бўлган Лионель Месси Буэнос-Айрес университетининг фахрий доктори унвонига сазовор бўлди. Бу ҳақда университет ўзининг расмий саҳифасида хабар берди.
Мессини фахрий доктор унвони билан тақдирлаш тўғрисидаги қарор Буэнос-Айрес университети Олий кенгаши томонидан бир овоздан қабул қилинган. Университет баёнотида футболчининг спортдаги ютуқлари ҳамда Аргентинани халқаро майдонда муносиб ҳимоя қилишдаги ҳиссаси алоҳида таъкидланган.
Шунингдек, Мессининг футболдаги фаолияти “мукаммаллик, матонат, камтарлик ва ахлоқий тамойиллар намунаси” сифатида эътироф этилган.
39 ёшли Месси 7 октябрь куни “Эстадио Монументал” стадионида Бенинга қарши ўтказилган ўртоқлик учрашувида терма жамоа либосидаги сўнгги ўйинини ўтказди. Ушбу баҳсда Месси 1 та гол ва 2 та ассист қайд этди.
Маълумот учун, Месси Испания чемпионати, “Барселона” ва Аргентина терма жамоаси тарихидаги энг яхши тўпурар ҳисобланади. Шунингдек, у тарихда саккиз марта “Олтин тўп”ни қўлга киритган ягона футболчидир.
Аргентина терма жамоаси сафида 208 та учрашувда майдонга тушган Месси 126 та гол урган. У миллий жамоа билан икки марта Америка кубоги (2021 ва 2024), 2022 йилги жаҳон чемпионлиги ҳамда 2022 йилги Финалиссимани қўлга киритган.
