Солиқ тўловчилардан келиб тушаётган мурожаатларни инобатга олган ҳолда, "Солиқчи-кўмакчи" тамойили асосида, 2023 йил 13 сентябрдан 23 сентябргача (23 сентябрь ҳам) 2022 йилдаги онлайн-НКТ ва маркетплейс чекларини таҳрирлаш имкони берилади. Бу ҳақда Солиқ қўмитаси матбуот хизмати хабар бермоқда.
Маълум қилинишича, ушбу даврда чекларнинг маҳсулот ва хизматлар идентификация коди (МХИК) ва “комитент СТИР” маълумотларини ўзгартириш мумкин.
Бунинг учун my3.soliq.uz сайтидаги шахсий кабинетида "Юридик шахсларнинг онлайн назорат касса техникаси маълумотлари" саҳифасидан "Чек маълумотлари" бўлимига кирилади.
Қидирув тизимига чекнинг фискал модули (ID), санаси ёки рақамини киритиб тузатиладиган чек топилади.
Очилган ойнада чек маълумотлари таҳрирланади.
Маълумот ўзгартиришлар киритилгандан сўнг, фақат битта файл – тадбиркорлик субъектининг таҳрирлаш натижаси бўйича юзага келадиган ўзгаришлар оқибатларини ўз зиммасига олиши ҳақидаги расмий хати (муҳрланган) илова қилиниши лозим.
"Сақлаш" тугмаси орқали жараён якунланади.
Чеклар таҳрирланган тақдирда тадбиркорлик субъектларидан тегишли ҳисоботларни қайта топшириш талаб этилади.
Маълумот учун: Тадбиркорлик субъектларига 2023 йилнинг ўтган даври учун апрель ва август ойларида чекларни таҳрирлаш имконияти берилган.
