“Nemolchi.uz” таҳририятига ҳарбий хизматдаги турмуш ўртоғи томонидан узоқ вақт давомида зўравонликка учраганини айтган аёл мурожаат қилди. Унинг баёнотига кўра, эри уни мунтазам ҳақоратлаган, камситган, калтаклаган ва ўлдириш билан таҳдид қилган. Аёлнинг айтишича, навбатдаги можародан сўнг у сирка кислотаси ичиб, шифохонага тушган. Бироқ ҳолат юзасидан эркакка нисбатан интизомий жазо — ҳайфсан билан чекланган.
Аёлнинг айтишича, улар 2023 йил 19 март куни турмуш қурган. Эркак унга биринчи хотини билан ажрашганини айтган, бироқ кейинчалик никоҳ расман бекор қилинмагани маълум бўлган. 2024 йил май ойида эса уларнинг никоҳи расмий қайд этилган.
Эркакнинг биринчи никоҳидан икки фарзанди бўлган. Аёлнинг сўзларига кўра, катта фарзанди тўйдан аввал вафот этган, кичиги эса бир ярим ёшда бўлган. У болага ўз фарзандидек ғамхўрлик қилганини, ишлагани ва уни тарбиялаганини айтган.
Унинг таъкидлашича, кейинчалик эри мунтазам равишда уни ҳақоратлаб, камсита бошлаган ва айрим ҳолларда сабабсиз калтаклаган. Аёл, шунингдек, эридан бошқа аёллар билан ёзишмаларни кўрганини, бироқ оилани сақлаб қолиш умидида бу ҳақда гапирмаганини билдирган.
Аёлнинг баёнотига кўра, бир куни эри уни ўз отасининг кўз ўнгида ўлдириш билан таҳдид қилган. Кейинчалик эркак хизмат жойи ўзгариши муносабати билан бошқа шаҳарга кўчган ва бир муддат улар алоҳида яшаган. Аёл бу даврда эри ўзгарган деб ўйлаган. Бироқ Термизга кўчиб ўтилганидан сўнг, унинг айтишича, зўравонлик яна давом этган.
2025 йил 13 сентябрь куни эркак ўзининг ва боланинг буюмларини йиғиб, Термизга кетган. Аёлнинг сўзларига кўра, у бу ҳақда олдиндан хабардор қилинмаган.
14 сентябрь куни эркакнинг акаси унга телефон қилган. Аёлнинг айтишича, суҳбат давомида эркак ва унинг қариндошлари уни ҳақоратлаган ва қадр-қимматини камситган. У эри бошқа аёл билан яшашга қарор қилган бўлса, ҳеч бўлмаса, ўзи ўз фарзандидек тарбиялаган болани ундан ажратмасликни сўраган. Жавобан эркак аёл боланинг туғишган онаси эмаслигини унга айтиб беришини билдирган.
Шундан сўнг аёл уйга кириб, сирка кислотаси ичган. У шифохонага ётқизилган. Аёлнинг таъкидлашича, эри унинг аҳволидан хабар олиш учун шифохонага келмаган.
Шундан кейин аёл 102 рақами орқали мурожаат қилиб, калтаклаш, ҳақорат ва таҳдидлар ҳақида хабар берган. Эркак ҳарбий хизматчи бўлгани сабабли материаллар ҳарбий прокуратурага юборилган. Аёлнинг айтишича, текширув якунида унга нисбатан фақат ҳайфсан қўлланган.
Орадан тахминан бир ярим ой ўтгач, аёл расмий никоҳи бекор қилинмаган бўлса-да, эри бошқа аёл билан яшаётганини билган. Шунингдек, мазкур аёл эридан ҳомиладор эканини ҳам маълум қилган.
Аёлнинг сўзларига кўра, ҳарбий хизматчи расмий никоҳи бекор қилинмаган ҳолда бошқа аёл билан шаръий никоҳдан ўтганини тан олган.
Мурожаатчи кейинчалик прокуратура, Ҳарбий прокуратура, Мудофаа вазирлиги ва бошқа идораларга бир неча бор мурожаат қилган. У мурожаатларида эри томонидан ўлдириш билан таҳдид қилингани, калтаклангани, мунтазам ҳақоратлангани, ўз жонига қасд қилишга урингани ва эркак бошқа оила қургани ҳақида маълум қилган.
“Nemolchi.uz” маълум қилишича, ушбу мурожаатлар яна эркак хизмат қилаётган ҳарбий қисмга юборилган ва масала интизомий жазо билан якунлангани айтилмоқда. Таҳририят Бош прокуратура, Ҳарбий прокуратура ва Мудофаа вазирлигидан ҳолатни ҳар томонлама ва холис текширишни сўраган.
Мурожаатчи эса бугун энг кўп ўзи фарзандидек тарбиялаган болани соғинаётганини айтган.
