Ўзбекистонда жиноий иш қўзғатилган Қирғизистон депутати Эмил Жамғирчиев суд қарори билан ҳибсга олинди.
Эслатиб ўтамиз, январь ойида Ўзбекистонда қирғизистонлик депутатга нисбатан давлат чегарасини ноқонуний кесиб ўтиш бўйича жиноий иш қўзғатилгани маълум қилинган эди. 2023 йилнинг 26 декабрь куни Қирғизистон Бош прокурори депутатга давлат чегарасини ноқонуний кесиб ўтгани учун жиноий иш қўзғатган.
Шу йилнинг январь ойида мамлакат парламенти депутатни жиноий жавобгарликка тортишга рози бўлганида, у Жогорку Кенеш биносининг иккинчи қаватидаги деразадан сакраб ғойиб бўлган. Бироқ, кейин Жамғирчиев адвокати билан Миллий хавфсизлик давлат қўмитасига сўроқ қилиш учун келган, шундан сўнг у қўйиб юборилган.
Депутатга нисбатан қўзғатилган жиноят иши бўйича тергов якуний босқичда. У тугаллангандан сўнг суд органларига юборилади, у ерда ҳибсга олинган шахснинг айби ёки айбсизлиги тўғрисида қарор қабул қилинади.
Эмил Жамғирчиевни Ўзбекистонга экстрадиция қилиш масаласига келсак, депутатнинг адвокати Қайсин Абакиров бу ерда унга нисбатан қўзғатилган иш бўлишига қарамай, уни мамлакатга экстрадиция қилиш мумкин эмаслигини айтган. Унга кўра, Қирғизистон Конституциясининг 51-моддасига кўра, Қирғизистон Республикаси фуқароси республикадан чиқариб юборилиши ёки бошқа давлатга экстрадиция қилиниши мумкин эмас.
Қирғизистон президенти Жогорку Кенеш депутати билан боғлиқ вазиятга ҳам изоҳ берди. Бу иш бўйича терговни Миллий хавфсизлик давлат қўмитаси ходимлари Ўзбекистон махсус хизматлари билан биргаликда олиб бораётганини айтган республика раҳбари “натижа қандай бўлиши уни қизиқтирмаганини” таъкидлади.
Қирғизистон президенти Садир Жапаров депутат Эмил Жамғирчиев ўзбекистонлик “таниқли криминал бошлиқ Салим Абдувалиев”дан ўзини ўлдиришда ёрдам сўраганлигини айтган эди.
