Париж мезбонлигидаги XXXIII ёзги Олимпия ўйинларига саноқли ойлар қолди. Осиё қитъасидан футбол бўйича Олимпия турнирига йўлланма эгаларини апрель-май ойларидаги U-23 Осиё кубоги мусобақаси аниқлаб беради. Ҳал қилувчи турнида Ўзбекистон Олимпия терма жамоаси ҳам иштирок этади.
Бугун ушбу мусобақа олдидан ЎФА раҳбарияти ҳамда Олимпия терма жамоам бош мураббийи Тимур Кападзе иштирокида матбуот анжумани ўтказилади.
Анжуманни ЎФА биринчи вице-президенти Равшан Ирматов очиб берди.
“Бутун халқимизнинг орзуси бўлган Олимпиада йўлланмасини қўлга киритишни ният қилмоқдамиз.
Бу йўлда улкан ҳаракатлар амалга оширилди. Бу борада профессионал ёндашувга қўл урилиб, “Олимпик” клуби ташкил этилди. Ўтган 3 йил давомида Тимур Кападзе бошчилигидаги мураббийлар қўл остида ёш футболчиларга ишонч билдирилди. Машғулотлар замонавий футбол имкониятлари асосида таҳлил қилиб борилди. Ёшларимиз халқаро мусобақаларда етарлича тажриба тўплади.
Ёшларга ишонч берилса, қандай натижаларга эришиш мумкинлигини ўтган мусобақаларда кўрдик”, - дея таъкидлади Ирматов.
“Ўтган уч йил давомида анча ўсишга эришдик, иккита йирик мусобақада иштирок этдик. Ушбу турнирларда ҳам, ўйлайманки, муносиб иштирок этдик. Эндиликда бизни муҳим мусобақа кутиб турибди. Умид қиламанки, Қатардаги мусобақада ҳаммамизнинг орзуларимиз ушалиб, Париж Олимпиадасига йўлланмани қўлга киритиш насиб қилсин”, - дея қўшимча қилди Ўзбекистон Олимпия терма жамоаси бош мураббийи Тимур Кападзе.
Шунингдек Равшан Ирматов айни дам чет эл клубларида тўп сўраёган ва Олимпия терма жамоасига чақирилган футболчилар ҳақида тўхталиб ўтди.
“Футболчиларимиз катта клубларда тўп сурмоқда. Улар клубларининг асосий футболчисига айланган ва бу биз учун қувонарли, албатта.
Бироқ бу турнир биз учун ҳам жуда муҳим. Футболчилар учун ҳам алоҳида аҳамиятга эга. Чунки футболчи фаолияти давомида йиғинларга жалб этилиши мумкин, лекин Олимпиада каби нуфузли турнирда иштирок этиш, ўйлашимча, бир бор насиб этади холос.
Шу сабабли айни пайтда клублар билан ҳар куни алоқада бўлиб, музокаралар ўтказмоқдамиз. Ҳозирда 2 нафар футболчимиз бўйича келишувга эришдик, 3 нафар футболчимиз бўйича музокаралар давом этмоқда.
Афсуски, ушбу турнир ФИФА кунларида ўтказилмаяпти. Ҳар бир клуб ўз чемпионати, ўз ўйинлари ҳақида ўйлайди. Биз ҳам буни тушунган ҳолда, уларни ҳурмат қилишимиз керак.
Бироқ таъкидлаганимиздек, биз клублар билан музокараларни давом эттиряпмиз ва уларга тушунтиришга ҳаракат қиляпмиз”, - деди у.
Шунингдек жамоа бош мураббийи тайёргарлик ҳақида гапирди.
“Бизда ҳар бир футболчи таркибга муносиб. Биз бир футболчига ишониб қолмаймиз. Бу футбол. Ким 23 талик якуний рўйхатга кирса, ўша тайёр бўлади. Бироқ легионарларимиз билан биз янада кучлироқмиз. Чунки улар Миллий терма жамоамизда ҳам асосий таркиб футболчилари ҳисобланади.
Қатарга қарши ўйин фойдали бўлди. Гуруҳ босқичида ҳам осон ўйин йўқ. Рақибларимиз ҳам ўсган. Насиб бўлса, гуруҳдан албатта чиқамиз”, - деди Тимур Кападзе.
Бундан ташқари Тимур Кападзе жамоанинг ўйинлар режаси, дарвозабонлар, витаминизация ва Париж Олимпиадасига катта футболчиларни жалб этиш ҳақида гапирди.
“Ўз услубимиз, режамиз бор. Лекин бу рақибга қараб ҳам ўзгариб боради, албатта. Осиё ўйинларида ҳам рақибларимизга қараб режа бўйича ишладик.
Дарвозабонлар масаласида кимга кўпроқ ишонч бериш борасида ҳали аниқ қарорга келмадик. Ҳали ҳам ишлаяпмиз. Ким тайёр бўлса, ўзини яхши ҳис қилса, ўша ўйнайди.
Интизом ҳақида келадиган бўлсак, йигитлар бу турнирнинг даражасини тушуниб турибди. Умид қиламиз, бу борада муаммо бўлмайди.
Витаминизация борасида муаммо йўқ. Тикланиш жараёнига ҳам жиддий қараяпмиз. Терма жамоалар бу масалага алоҳида эътибор қаратишади.
Миллий жамоада ҳам кучли футболчилар етарлича. Бу режамизда бор, кенгайтирилган таркибда уларни ҳам жалб қиламиз. Аввало, Олимпиада йўлланмасини ҳал қилайлик, бу борада ҳам ўйлаб кўрамиз”, - деди Ўзбекистон Олимпия терма жамоаси бош мураббийи Тимур Кападзе.
