“Ўзбeкистон маданий мероси жаҳон тўпламларида” туркумининг 10 янги жилди тақдимот қилинди

Самарқандда давом этаётган “Буюк аждодлар мероси – Учинчи Ренессанс асоси” VIII халқаро конгресси доирасида “Ўзбeкистон маданий мероси жаҳон тўпламларида” туркумининг 10 та янги жилди тақдимоти ўтказилди.

Мазкур нашрлар Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти томонидан тайёрланган. Лойиҳа турли сабабларга кўра, айни пайтда хориждаги музейлар, кутубхоналар, турли коллекциялар ва бошқа муассасаларда сақланаётган ўзбек халқининг маданий ёдгорликлари ва моддий буюмлари, қадимий қўлёзмалар, нодир ашёлар ҳақидаги маълумотларни жамлаш, уларнинг нусхаларини олиш ва халқимизга етказишга қаратилган.

Шу пайтгача 70 жилдлик китоб-альбомлар нашр қилиниб, юртимиз ва чет эллардаги энг машҳур кутубхоналар, олийгоҳ ва  музейлар, нуфузли илм-маърифат масканларига етказиб берилган. Шу ишларнинг давоми сифатида мазкур туркумдаги яна 10 та янги жилд нашр этилди.

 – Лойиҳани амалга оширишга юртимиз олимлари билан бирга хориждаги ҳамкорларимиз, тарихчилар, музей ходимлари иштирок этмоқда. Бу галги 10 жилдни тайёрлашда ҳам уларнинг ҳиссаси катта бўлди ва Буюк Британия, Греция, Ҳиндистон, Қозоғистон, Туркманистон ва бошқа давлатлардаги юртимиз тарихий меросига оид ноёб қўлёзмалар, ҳужжатлар, музей экспонатлари, тарихий асарлар ўрганилди. Бу ноёб маълумотлар албатта, мамлакатимиз тарихи, аждодларимиз маънавий меросини ўрганиш ва тадқиқ этишга хизмат қилади, – дейди Ўзбекистондаги ислом цивилизацияси маркази илмий ходими Рустам Жабборов ЎзАга берган интервьюсида.