Кеча, 1 сентябрь куни Сурхондарёда жойлашган газ конида портлаш содир бўлгани айтилган видео ижтимоий тармоқларга сиздирилди. Ушбу ҳолат юзасидан ФВВ Матбуот хизмати изоҳ берди.
Унга кўра, кеча, 1 сентябрь куни соат 15:17 да Сурхондарё вилояти Бойсун туманида жойлашган "Мустақилликнинг 25 йиллиги" конига қарашли 604-сон қудуғида бурғилаш ишлари олиб бориш вақтида технологик жараённинг бузилиши натижасида олтингугурт (водород сулфид) гази чиқиши кузатилган.
Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинган.
"Фуқароларни тан-жароҳати олиш ва ҳалок бўлиш ҳолатлари қайд этилмаган. Вазият тўлиқ назорат остида" - дейилади хабарда.
Ҳодиса жойига тегишли ташкилотларнинг вакиллари ва вилоят ҳокими Улуғбек Қосимов етиб борган. Мутахассислар томонидан барча зарурий ишлар олиб борилмоқда.
