"Бугунги кунда Европа Иттифоқининг мамлакатимизга (Россияга – таҳр.) қарши жорий қилган турли шаклдаги санкцияларидан кўрган зарари, амалдаги ҳисоб-китобларга кўра, 1,5 триллион евродан ошади. Бу Европа Иттифоқи қилган сиёсий танловнинг бадалидир”, деган Россия ташқи ишлар вазирининг ўринбосари Александр Грушко ТАСС мухбирига берган интервьюсида.
Мулозимнинг сўзларига кўра, Европа Иттифоқи “ўз-ўзини йўқ қилиш йўлидан бормоқда”, Россия иқтисодиёти эса “санкцияларга мослашиб олган”. “Санкцияларни жорий этиш билан ҳеч қандай геосиёсий мақсадларга эришиб бўлмайди”, деган Грушко, “Aгар Европа Иттифоқи Россия билан ҳар қандай иқтисодий ҳамкорликдан бутунлай воз кечиб, жаҳон иқтисодиётидан “узилиб” кетмоқчи бўлса, бу Европа Иттифоқининг танловидир”.
Ташқи ишлар вазири ўринбосари Москва “бундай муносабатлардан манфаатдор бўлган ҳамкорлар билан” иқтисодий алоқаларни ривожлантиришини таъкидлади.
Эслатиб ўтамиз, аввалроқ, Венгриянинг ЕИ Кенгашидаги ваколатхонаси Европа Иттифоқининг 27 давлатининг доимий вакиллари Украинадаги можаро туфайли Россияга қарши санкцияларнинг 15-пакети, жумладан, Россия нефтини ташувчи хорижий танкерларга қарши чоралар бўйича келишиб олгани ҳақида хабар берган эди.
