Суриянинг собиқ президенти Башар Асад оиласининг хориждаги мол-мулки халқаро миқёсда ҳақиқий ов нишонига айланади. Бу ҳақда The Wall Street Journal ўз манбаларга таяниб хабар берди.
Уларга кўра, Башар Асаднинг хорижда сотиб олинган мулклари орасида Россиядаги кўчмас мулклар, Венадаги меҳмонхоналар ва Дубайдаги шахсий самолёт каби мулклар бор.
Жумладан, Оқ уйнинг собиқ расмийси, Aсаднинг активларини ўрганган Эндрю Тейблер таъкидлаганидек, собиқ президент мулклари учун ов аллақачон халқаро миқёсда бошланган. "Улар (Сурия собиқ президентининг оиласи) ҳар доим “Б” режага эга бўлган ва улар мамлакатдан қочиб кетиб, қувғинда яшаш эҳтимолига яхши тайёрланган", - дея қўшимча қилган Эндрю Тейблер.
Охирги маълумотларга қараганда, 2013-2019 йилларда, сурияликлар уруш ва очлик ва қашшоқликдан қийналиб, миллионлаб кўламда хорижга қочишга мажбур бўлган даврда Башар Асад оиласи Москва-ситидан 40 миллион доллар эвазига 19 та уй сотиб олган. (https://www.ft.com/content/fb48c0f4-009c-11ea-b7bc-f3fa4e77dd47)
Маълумки, ноябрь ойи охирида қуролли мухолифат гуруҳлари Сурия армияси позицияларига қарши кенг кўламли ҳужумга ўтди. 8 декабр куни улар Дамашққа кирди, шундан сўнг ҳукумат армияси чекиниб, кейинчалик айримлари таслим бўлди, айримлари қочиб кетди. Башар Асад эса Сурия халқига тегишли 135 миллиард долларни ўғирлаб Россияга қочиб кетди. (https://nv.ua/world/countries/bashar-asad-mog-vyvezti-iz-sirii-v-rossiyu-135-milliardov-dollarov-kontrabandoy-50473250.html)
2024 йил январидан буён Идлиб вилоятида мухолифат томонидан тузилган “Нажот ҳукумати”ни бошқариб келаётган Муҳаммад ал-Башир жорий йилнинг 10 декабрида Сурия вазирлар кабинетининг 1 мартгача давом этадиган ўтиш даврига раҳбар этиб тайинланганини эълон қилди.
