Москва вилоятининг Балашиха яқинидаги Черное қишлоғида генерал Игор Кирилловни ўлдиришда гумон қилинган Ўзбекистон фуқароси қўлга олинди. Бу ҳақда Ички ишлар вазирлиги расмий вакили Ирина Волк маълум қилган.
Гумонланувчи эркак шахсини Россия Ички ишлар вазирлиги ходимлари, Москва полицияси, ФХХ ходимлари ва Тергов қўмитасининг терговчилари аниқлаган. Гумонланувчи тергов органларига топширилган.
Қўлга олинган шахс Ўзбекистон фуқароси бўлиб, 29 ёшда, дея хабар қилди Тергов қўмитаси. Сўроқ пайтида гумонланувчи Украина махсус хизматлари томонидан ёлланганини айтган. У Москвага келиб, "қўлбола портловчи қурилмани қабул қилиб олган". Шундан сўнг, уни Рязанский проспектидаги "Игор Кириллов яшаган" турар-жой биносининг кираверишида турган электросамокатга ўрнатган.
Гумонланувчининг шахси видеокамералардаги ёзувлар таҳлил қилинганидан сўнг аниқланган. Бунга каршеринг машинасидаги видеорегистратор камерасининг ёзувлари катта ёрдам берган. Мобил телефонни биллинги ҳам ҳуқуқни ҳимоя қилиш ходимларига қўл келган – терговчилар жиноят содир этилган ҳудудда одамларнинг қўнғироқлари ва ҳаракатланишлари ҳақидаги маълумотларни текшириб, гумонланувчиларни аниқлаган.
Телефонлардаги маълумотлар текшириб кўрилганда, “гумонланувчи эркаклар қотиллик ташкилотчилари билан мессенжерлар орқали алоқа қилиб туришгани тасдиқланган”.
Aввалроқ ушбу қотилликда Украина махсус хизматларининг “қўли борлиги” ҳақида баёнот берилган эди. Бу терговнинг асосий версияси ҳисобланади.
Тергов қўмитасининг аниқлик киритишича, асосий гумонланувчи каршерингдан автомобил ижарага олган ва уни генерал Кириллов уйи яқинига қўйган ва ичига видеокузатув камераси ўрнатган. Ушбу камерадан Кирилловнинг уйига кираверишдаги тасвир ва товуш сигналлари бевосита Украинанинг Днепр шаҳрига трансляция қилинган.
Эслатиб ўтамиз, Reuters ахборот агентлиги 17 декабр куни Украина хавфсизлик хизматидаги манбага асосланиб, радиоактив, кимёвий ва биологик мудофаа қўшинлари бошлиғи Генерал-лейтенант Игорь Кириллов Украина махсус хизматлари амалиёти натижасида йўқ қилинганини хабар қилган эди.
Абдуллоҳ Саййид
