Туркиянинг Истанбул шаҳрида тўйхонада юз берган пичоқбозлик оқибатида 33 ёшли Қилич Бўриев ҳалок бўлди. Айрим турк нашрлари уни Ўзбекистон фуқароси сифатида кўрсатган. Бироқ Ўзбекистоннинг Истанбулдаги Бош консулхонаси марҳум Туркманистон фуқароси эканини маълум қилди.
ОАВ хабарларига кўра, ҳодиса соат 23:30 атрофида Истанбулнинг Кичикчекмеже тумани Кемалпоша маҳалласидаги тўйхонада содир бўлган. Тўй маросими вақтида икки гуруҳ ўртасида келиб чиққан тортишув қарийб бир соат давом этган ва пичоқбозлик билан якунланган.
Жанжал вақтида маст ҳолатда бўлган Р.Т. исмли шахс Қилич Бўриевнинг бўйнига пичоқ урган. Оғир жароҳат олган эркакка воқеа жойида биринчи ёрдам кўрсатилиб, шифохонага олиб кетилган. Бироқ шифокорлар унинг ҳаётини сақлаб қола олмаган.
Тезкор-қидирув тадбирлари давомида гумонланувчи қўлга олинган. Жиноятда фойдаланилган пичоқ ашёвий далил сифатида олиб қўйилган. Сўроқдан сўнг Р.Т. суд қарори билан ҳибсга олинган.
Ўзбекистоннинг Истанбулдаги Бош консулхонаси ўрганишлар натижасида марҳум Қилич Бўриев Туркманистон фуқароси экани ва Ўзбекистон фуқароси эмаслиги аниқланганини билдирган.
