Андижон вилоятидан Қорақалпоғистон Республикасига 20 га яқин бола 3 та Damas`да олиб кетилаётгани аниқланди. Бу ҳақда Йўл ҳаракати хавфсизлиги хизмати хабар берди.
Қайд этилишича, 15 декабрь куни А-380 автомобиль йўлининг Бухоро вилояти ҳудудидан ўтувчи 325 километрида 3 та Damas тўхтатиб текширилган. Машиналарда 3 нафар мураббий ва йигирмага яқин болалар борлиги аниқланган.
ЙҲХХ ахборот хизматига кўра, болалар 1,5 минг километр масофа орқали Нукус шаҳрида ўтказилиши режалаштирилган кураш мусобақасига кетаётган бўлган. Ҳар бир машинада 6−7 нафардан бола ва бир мураббий кетаётгани маълум қилинди.
"Бу каби ҳолатлар сўнги вақтлар бир неча бор такрорлангани боис ЖХД ЙҲХХда Транспорт, Спорт ҳамда Мактабгача ва мактаб таълими вазирликлари, шунингдек, қуйи бўғин раҳбарлари билан кенгайтирилган йиғилиш ўтказилди", — дейилади хабарда.
Тадбирда сўз олганлар болаларнинг кўнгилсиз ҳодисаларга учрашига имкон яратувчи қонунбузарликлар содир этилишини танқид қилган. Болалар иштирокидаги оммавий саёҳатлар учун белгиланган талабларга риоя қилиш кераклиги эслатилган.
Маълумот ўрнида, Вазирлар Маҳкамаси қарорига асосан болалар гуруҳлари, умумтаълим мактаблари ва ўрта махсус таълим муассасалари ўқувчилари фақат махсус жиҳозланган хизмат автомобилларидан фойдаланган ҳолда, ички ишлар органлари кузатувида ташилиши белгиланган.
