АҚШ Президенти Дональд Трамп ўзининг Truth Social платформасидаги саҳифасида собиқ президент Жо Байденнинг махфий маълумотларга кириш ҳуқуқини бекор қилганини ва унинг кундалик разведка брифингларини тўхтатганини маълум қилди. Трампнинг таъкидлашича, Байденнинг бундай маълумотларни олишига ҳожат йўқ.
Трамп бу қарорини 2021 йилда Байденнинг ўзига нисбатан шундай чора кўргани билан изоҳлади. Ўшанда Байден Трампнинг 2020 йилги президентлик сайловларидан кейинги хатти-ҳаракатлари туфайли унинг разведка маълумотларига киришини чеклаган эди.
Бундан ташқари, Трамп махсус прокурор Роберт Ҳурнинг 2024 йилдаги ҳисоботини келтириб, унда Байден "яхши ниятли, лекин ёмон хотирага эга бўлган кекса одам" сифатида тавсифланганини таъкидлади. Трампнинг сўзларига кўра, бундай хотира билан Байденга махфий маълумотларни ишониб бўлмайди.
Байденнинг матбуот котиби мазкур қарорга ҳозирча изоҳ бермади. Маълумот учун, 2021 йилда Байден Трампнинг "ноодатий хатти-ҳаракатлари" туфайли унинг разведка брифингларига киришини тўхтатган эди.
Трампнинг бу қарори унинг сиёсий рақибларига қарши кўраётган чораларининг давоми бўлиб, у аввалроқ собиқ миллий хавфсизлик маслаҳатчиси Жон Болтон, иммунолог Энтони Фаучи ва собиқ давлат котиби Майк Помпео каби шахсларнинг хавфсизлик рухсатномаларини ҳам бекор қилган эди.
Абдуллоҳ Саййид
