Президент Дональд Трамп ноқонуний муҳожирларнинг ҳибсга олиниши ва депортацияси ваъда қилинган даражада эмаслигидан “жинни бўлмоқда", деб хабар берди NBC News манбаси.
Иммиграция ва Божхона Назорати (ICE) агентларига ноқонуний муҳожирларнинг ҳибсга олиниши ва депортациясини ошириш бўйича босим кучаймоқда. Бу ҳақда ICE ва Оқ уйдаги муҳокамалардан хабардор учта манба маълум қилди.
Трампга яқин манбага кўра, президент кўпроқ одамлар депортация қилинмаётганидан "жахли чиқмоқда" ва бу хабар "чегара ишлари бўйича масъул" Том Ҳоман, Ички хавфсизлик вазири Кристи Ноэм, Оқ уй аппарати раҳбари ўринбосари Стивен Миллер ва ICE директори вазифасини бажарувчи Калеб Вителлога етказилган.
"Бу уни жинни қилиб қўйяпти – улар кўпроқ одамларни депортация қилиша олмаяпти", – деди Трамп фикрига яқин манба.
Оқ уй матбуот котиби Куш Десай эса баёнот бериб, "Жо Байден маъмуриятининг тўрт йиллик малакасизлиги ва бефарқлигидан сўнг, Трамп маъмурияти АҚШ муҳожирлик қонунларига аниқ ва кескин риоя этишни тиклади. Президент Трамп лавозимга келганидан бери ICE томонидан юзлаб зўравон, жиноий гуруҳларга оид ноқонуний муҳожирлар қўлга олиниб, депортация қилинди. Трамп маъмурияти чегараларни мустаҳкамлаш ва оммавий депортацияларни тез ва самарали ўтказишда бирлашган ҳолда ҳаракат қилмоқда, бу эса Америка ва америкаликлар манфаатлари учун қилиняпти", – деди.
ICE ички муҳокамаларидан хабардор манбага кўра, Ҳоман ҳар куни агентлар билан видеоконференция ўтказиб, уларнинг депортация натижаларидан қониқмаётганини очиқ билдирмоқда.
Бошқа бир манба эса "Ҳоман бу кўрсаткичлардан норози ва бу норозилигини очиқ билдирган", деб айтди.
ICE раҳбари Вителло эса январь ойида агентларга кунлик 1 200 – 1 400 та ҳибсга олиш режасига эришишни топширган. Аммо ICE томонидан X (собиқ Twitter) платформасида эълон қилинган маълумотларга кўра, Трамп инаугурацияси кунидан бери энг юқори кўрсаткич 1 100 та ҳибсга олишни ташкил қилган, сўнгра бу рақам пасайган. Ҳатто шу ҳафтада ҳам ҳибсга олишлар 800 дан ошмаган, ўтган дам олиш кунлари эса бор-йўғи 300 нафар муҳожир ҳибсга олинган.
Трамп инаугурация кунида ваъда қилган "миллионлаб" депортацияни амалга ошириш учун маъмурият ҳар куни камида 2 700 нафар муҳожирни депортация қилиши керак бўлади.
Бундан ташқари, NBC News маълумотларига кўра, ҳибсга олиш дарҳол депортация қилинади дегани эмас. Трамп маъмуриятининг илк икки ҳафтасида ҳибсга олинган 8 000 нафар муҳожирдан 461 нафари озод қилинган.
Абдуллоҳ Саййид
