Германия канцлери "Зеленский - диктатор” дегани учун Трампни танқид қилди
Германия канцлери Олаф Шольц АҚШ президенти Дональд Трампнинг Украина президенти Владимир Зеленскийни “диктатор” деб атаганини танқид қилди. “Президент Зеленскийнинг демократик легитимлигини инкор этиш мутлақо нотўғри ва хавфли”, — деди Шольц Der Spiegel журналига берган изоҳида.
“Владимир Зеленский Украина халқ томонидан сайланган давлат раҳбари экани ҳақиқат. Уруш давом этаётган шароитда тўлиқ сайловларни ўтказиб бўлмаслиги Украина конституцияси ва сайлов қонунларига мос келади. Ҳеч ким бу борада бошқача даъво қилмаслиги керак”, — деб қўшимча қилди у.
Канцлер Украинадаги урушни Владимир Путин бошчилигидаги Россия бошлаганини эслатиб ўтди.
“Украина қарийб уч йилдан бери шафқатсиз Россия тажовузига қарши ўзини ҳимоя қилмоқда. Кун сайин, ҳар куни”, — деди Шольц.
Шу билан бирга, Германиянинг Христиан-демократик иттифоқи (CDU) канцлерликка номзоди Фридрих Мерц Трампнинг Украина ҳақидаги баёнотларини кескин рад этди.
Трамп Киев ҳукумати Россия тажовузи учун қисман айбдор эканини ва можарони анча олдин тинч йўл билан ҳал қилиш мумкин бўлганини айтганидан сўнг, Мерц ARD телеканалига берган интервьюсида қуйидагича изоҳ берди:
“Бу мутлақо классик айбдор ва жабрдийда ўринларини алмаштиришдир”, — деди у ва бу Владимир Путин бошчилигидаги Россия пропагандасига мос келишига ишора қилди.
“Ростини айтсам, Дональд Трамп энди бу дезинформацияни ўз зиммасига олганидан бироз ҳайратдаман”, — дея қўшимча қилди Мерц.
Чоршанба куни Трамп украин етакчисини “сайловсиз диктатор” деб атади ва “у тез ҳаракат қилмаса, унинг мамлакатидан асар ҳам қолмайди” деб огоҳлантирди.
У бу фикрларни Truth Social ижтимоий тармоғида Зеленскийнинг унинг “Киев ҳеч қачон бу урушни бошламаслиги керак эди” деган даъвосига жавоб берганидан бир неча соат ўтиб ёзди. Зеленский Трампни “Россия дезинформация ҳудудида яшамоқда”, деб айблади.
Трамп Киев ва Европа ҳукуматлари иштирокисиз Украинада уч йилдан бери давом этаётган урушни тугатиш бўйича музокараларни жадаллаштирганини таъкидлади.
У Европани Украинада тинчлик ўрнатишда муваффақиятсизликда айблади ва АҚШ бу урушни тугатиш бўйича самарали музокаралар олиб бормоқда, деди.
Абдуллоҳ Саййид
