Жанубий Каролина вакили, конгрессмен Жо Уилсон АҚШнинг янги 250 долларлик купюрасида Дональд Трамп суратини жойлаштириш таклифи асосида янги қонун лойиҳасини ишлаб чиқмоқда. Бу таклиф Трампнинг молиявий ютуқларини эътироф этиш мақсадида илгари сурилмоқда.
Республикачилар партияси аъзоси Уилсон янги банкнот учун сунъий интеллект томонидан яратилган кўринишдаги Трамп портретини намойиш қилди ва инфляция даражасининг ортиши оқибатида америкаликлар кўпроқ нақд пул олиб юришга мажбур бўлаётганини таъкидлади. У, шунингдек, "Байденфляция" (Bidenflation) атамасини ишлатиб, 2022 йилда 9,1 фоизга етган инфляция даражасини эсга олди.
Бу таклиф, АҚШ Конгрессида Трампнинг Оқ уйга қайтиши муносабати билан уни шарафлаш мақсадида йўлга қўйилган бир неча ташаббуслардан биридир.
“Миннатдорлик билан эълон қиламанки, мен Дональд Трамп тасвирланган 250 долларлик пул купюрасини яратиш бўйича АҚШ Гравюра ва босмахона бюросига йўналиш берувчи қонун лойиҳасини ишлаб чиқмоқдаман,” – деб ёзди Уилсон ўзининг X (собиқ Twitter) саҳифасида.
“Байденфляция иқтисодиётни вайрон қилди, америкалик оилалар эса кўпроқ нақд пул олиб юришга мажбур бўлмоқда. Энг қимматли президент учун энг қимматли купюра!”
АҚШ Молия вазирлиги пул банкноталардаги шахсларни танлаш учун масъул бўлиб, улар ҳақида “америкаликлар яхши билган тарихий шахслар”ни танлашини таъкидлайди. Бироқ, федерал қонун ҳали ҳаёт бўлган шахсларнинг суратини АҚШ валютасига жойлаштиришни тақиқлайди.
Ҳозирда АҚШда етти хил - 1, 2, 5, 10, 20, 50 ва 100 долларлик банкнота муомалада мавжуд. Улар Федерал резерв тизими томонидан чиқарилади ва Гравюра ва босмахона бюроси томонидан ишлаб чиқарилади.
Ҳозирда муомалада 250 купюра мавжуд эмас. 100 дан юқори қийматли банкноталар – 500, 1,000, 5,000 ва 10,000 доллар купюралари – охирги марта 1945 йилда босилган бўлиб, 1969 йилда кам фойдаланилгани сабабли муомаладан олиб ташланган.
Бундан ташқари, Конгрессда республикачилар Трампни шарафлаш учун бир қатор ташаббусларни илгари сурмоқда.
Нью-Йорк вакили Клаудия Тенни Трампнинг туғилган кунини расмий федерал байрам сифатида эълон қилиш бўйича қонун лойиҳасини таклиф қилди. У 14 июнь – Трампнинг туғилган куни ва Миллий Байроқ кунини бирлаштиришни таклиф этган.
Шунингдек, ўтган ойда Флорида вакили Анна Паулина Луна Трампнинг юз суратини Маунт Рашмордаги президентлар ёдгорлигига қўшиш бўйича ташаббусни илгари сурган.
“Унинг мамлакатимиз учун қайд этган тарихий ютуқлари ва келажакдаги муваффақиятлари бу улкан миллий ёдгорликда энг юксак эътирофга лойиқдир”, – деб ёзди Луна ўзининг X саҳифасида. “Тайёрланинг, ҳайкал қўйиш бошланади!”
Бундан ташқари, Жоржия вакили Бадди Картер расман Гренландия номини “Қизил, Оқ ва Кўк Ер” (“Red, White, and Blueland”) деб ўзгартириш бўйича қонун лойиҳасини таклиф қилди. Бу ташаббус Трампнинг Дания ҳудуди бўлган Гренландияни сотиб олиш истаги ортидан пайдо бўлди.
Шунингдек, Теннеси вакили Энди Оглс Трампга учинчи муддат президентликка сайланиш имконини бериш учун АҚШ Конституциясининг 22-қўшимчасига (22nd Amendment) ўзгартиш киритишни таклиф қилди. Бу қўшимча 1951 йил 27 февралда ратификация қилинган бўлиб, бир шахснинг 2 муддатдан ортиқ президентликка номзодини қўйишини тақиқлайди.
Мазкур таклиф Трампнинг иккинчи президентлик муддати бошланганидан атиги уч кун ўтиб илгари сурилган.
Яқинда, АҚШ вазирлар кабинетининг биринчи йиғилиши Трамп ташаббусига кўра, дуо билан очилди. Дуо қилувчи шахс “Президент Трампни юборгани учун Худога шукр” дея дуосини бошлади.
Абдуллоҳ Саййид
