25 октябрга ўтар кечаси Россиянинг Белгород шаҳрига оммавий дрон ҳужуми уюштирилди. Оқибатда бир киши ҳалок бўлди, яна 14 киши жароҳатланди. Бу ҳақда вилоят губернатори Александр Шуваев маълум қилди.
Унинг сўзларига кўра, жароҳатланганларнинг саккиз нафари шаҳар шифохоналарида стационар даволанмоқда. Зарур бўлса, улар федерал клиникаларга юборилади. Қолган олти киши амбулатор шароитда даволанмоқда.
Губернаторнинг маълум қилишича, ҳужум оқибатида 30 та кўп қаватли ва тўртта ҳовли уй, учта маъмурий бино, саккизта тижорат объекти ҳамда учта ижтимоий муассаса зарар кўрган. Шунингдек, 35 та автомобиль шикастланган.
Белгород мэри Валентин Демидов уй-жой фондига жиддий зарар етганини билдирган. Унинг айтишича, 53 киши вақтинчалик жойлаштириш пунктлари хизматидан фойдаланишга қарор қилган.
"Пепел" нашри маълумотларига кўра, дронлар "МегаГринн" савдо-кўнгилочар маркази ва "Париж" турар жой мажмуаси ҳовлисига тушган. Украинанинг Супернова+ мониторинг канали ҳам майдони 163 минг квадрат метрдан ортиқ бўлган МегаГринн марказига зарба берилгани ҳақида хабар тарқатган. 25 октябрь куни эрталаб марказ маъмурияти ҳеч қандай сабаб кўрсатмасдан, объект фаолият юритмаётганини маълум қилган.
Шунингдек, Украина Қуролли кучлари Россиянинг Курск вилоятига ҳам ҳужум қилган. Губернатор Александр Хинштейннинг хабар беришича, Хомутовка туманидаги энергетика объекти зарар кўрган. Натижада 104 та аҳоли пунктида яшовчи қарийб 11 минг истеъмолчи электр таъминотисиз қолган.
Болшесолдатск туманининг Козиревка қишлоғида эса FPV-дрон автомобильга ҳужум қилган. Оқибатда 30 ёшли эркак жароҳатланган.
Липецк шаҳрининг Бунин кўчасида ҳам бир нечта автомобиль ёниб кетган. Вилоят губернатори Игорь Артамонов бу ҳолатга дрон парчаларининг тушишини сабаб қилиб кўрсатган. Бироқ маҳаллий чатларда яшовчилар бу маълумотга шубҳа билдирган. Уларнинг айтишича, атрофдаги уйларнинг 11-қаватигача дераза ромлари ва ойнаси учиб кетган. Шунингдек, жабрланганлар борлиги ҳақида ҳам хабарлар тарқалган.
Ростов вилояти губернатори Юрий Слюсар кечаси вилоятнинг бешта тумани — Верхнедонской, Миллерово, Кашари, Чертково ва Шолохов туманларида 50 дан ортиқ дрон йўқ қилинганини маълум қилган. Унинг таъкидлашича, жабрланганлар ҳақида маълумот келиб тушмаган.
Россия Мудофаа вазирлиги эса мамлакатнинг 22 та ҳудуди, аннексия қилинган Қрим ва Азов денгизи акваторияси устида Украинанинг 532 та дрони йўқ қилингани ҳақида ҳисобот берган.
