Трампнинг гольф ўйнаши АҚШ бюджетига 18 миллион долларга тушди
Huffpost нашрининг ёзишича, Трампнинг илк президентлик муддати давомида унинг гольф ўйнаш вақтида хавфсизлигини таъминлаш харажатлари 151,5 миллион долларга етган.
АҚШ президенти Дональд Трампнинг Флоридадаги шахсий гольф майдонларида дам олиши учун Америка солиқ тўловчилари ҳисобтдан га 20 январда Оқ уйга қайтганидан бери 18 миллион доллар ажратилган.
Нашрнинг ҳисоб-китобларига кўра, Трамп шу вақт мобайнида Флоридада жойлашган иккита гольф-клубида 13 кун ўтказган. Юқори харажатлар майдонларнинг катта ҳудуди билан боғлиқ бўлиб, уларни муҳофаза қилиш учун АҚШ Қирғоқ муҳофазаси кемаларини ва кўп сонли ҳуқуқ-тартибот органи ходимларини жалб қилиш талаб этилган.
Нашрнинг маълумотига кўра, Трампнинг биринчи президентлик муддатида унинг гольф ўйнаш вақтида хавфсизлигини таъминлаш харажатлари 151,5 миллион долларга етган эди. Иккинчи муддат давомида харажатлар янада ошиши мумкин.
Эслатиш жоиз, АҚШнинг амалдаги президентига 2024 йилдаги сайловолди кампанияси давомида икки марта суиқасд уюштирилган, улардан бири Флорида штатидаги Уэст-Палм-Бич шаҳрида, Трамп гольф ўйнаётган жой яқинида содир бўлган эди.
Абдуллоҳ Саййид
