Ўзбекистондаги Ислом цивилизацияси марказида Қуръони карим қўлёзмаларини хронологик тадрижини яратиш масаласи муҳокама этилди. Бу ҳақда Ислом цивилизацияси маркази Ахборот хизмати хабар қилди.
Марказ катта илмий ходими Абдулазиз Мансур ва Ислом дини меросини сақлаш бўлими бошлиғи Мирзо Кенжабек хориж фондларида сақланаётган Қуръони карим қўлёзмаларини даврлаштириш ҳақида фикр билдиришди. Улар ҳар бир қўлёзманинг тарихий аҳамияти, хаттотлик намуналари ва қоғоз турлари даврга боғлиқ равишда фарқ қилишини таъкидлашди.
Шунингдек, муҳокама доирасида 91 та Қуръон қўлёзмаси кўриб чиқилди. Кейинги босқичда яна 180 та қўлёзма ўрганилиши ва асл нусхаларга таянган ҳолда даврий аниқликка эришиш мумкинлиги қайд этилди.
Қуръонларнинг қайси ҳукмдорлар даврида ёзилгани ва сақлаш тартиби муҳим аҳамиятга эга бўлиб, марказ томонидан хориждан махсус Қуръон қўлёзмаларининг асли ёки факсимилени олиб келиш ишлари давом этмоқда. Хронологик тартибланган Қуръони карим қўлёзмалари Марказнинг Қуръони карим зали экспозициясидан жой эгаллайди.
