Россия АҚШдан Украинада 30 кунлик ўт очишни тўхтатиш режаси бўйича жавоб кутаяпти. Кремль чоршанба, 12 март куни маълум қилишича, АҚШ ва Украина ўртасида Саудия Арабистонида бўлиб ўтган музокаралар натижаси ҳақида расмий маълумот олгандан кейингина таклиф қилинган ўт очишни тўхтатиш режасига Россиянинг муносабати аниқ бўлади.
Сешанба, 11 март куни Жидда шаҳрида украин расмийлари билан саккиз соатдан ортиқ давом этган музокаралардан сўнг, АҚШ давлат котиби Марко Рубио Украина томонидан қабул қилинган 30 кунлик ўт очишни тўхтатиш таклифини Россияга етказишга рози бўлганини билдирди.
Шунингдек, АҚШ аввал тўхтатилган ҳарбий ёрдам ва разведка маълумотларини Украинага қайта тиклашга ҳамда Россия билан икки томонлама музокаралар ўтказишга розилик берди. Бу эса Вашингтоннинг Украинага нисбатан узоқ йиллик сиёсатидаги кескин бурилиш ҳисобланади.
Кремль матбуот котиби Дмитрий Песков журналистларга берган баёнотида Россия Вашингтондан расмий маълумот кутаётганини айтди. У зарурат туғилган тақдирда президентлар Владимир Путин ва Дональд Трамп ўртасида телефон орқали суҳбат ташкил этилиши мумкинлигини истисно этмади.
Reuters агентлигининг юқори мартабали россиялик манбаси айтишича, Россия ўт очишни тўхтатиш шартларини батафсил муҳокама қилиши ва қандайдир кафолатлар олиши лозим.
"Путин бундай таклифга ҳозирги ҳолатида рози бўлиши қийин," — деди Reuters манбаси. "Унинг қўлида кучли позиция бор, чунки Россия фронтда илгарилаяпти."
Ҳозирда Россия Украина ҳудудининг қарийб 20 фоизини (113 000 квадрат километр) назорат қилмоқда ва бир неча ойдан бери аста-секин олдинга силжиб келмоқда. Украина 2024 йил август ойида Россиянинг ғарбий қисмида кичик бир ҳудудни эгаллаб, уни музокараларда қўллаш учун ишлатган эди, аммо очиқ манбалар ва Россия баҳоларига кўра, у ердаги назорати сусаймоқда.
Россиянинг 2022 йилда Украинага босқини натижасида юз минглаб одам ҳалок бўлди ёки жароҳатланди, миллионлаб инсонлар ўз уйларини тарк этишга мажбур бўлди. Бу уруш 1962 йилдаги Куба ракеталар инқирозидан бери Москва ва Ғарб ўртасидаги энг йирик тўқнашувга айланди.
Абдуллоҳ Саййид
