Тошкент вилоятининг Ангрен шаҳрида қарийб 80 миллион сўмлик қалбаки пулларни тайёрлаш ва муомалага киритиш билан шуғулланган икки нафар шахс қўлга олинди. Бу ҳақда Давлат хавфсизлик хизмати хабар берди.
Маълум қилинишича, ДХХнинг Тошкент вилояти бўйича бошқармаси ходимлари вилоят Ички ишлар бош бошқармаси билан ҳамкорликда тезкор тадбир ўтказган. Унда Ангрен шаҳрида яшовчи, 1993 йилда туғилган фуқаро 1997 йилда туғилган таниши билан олдиндан тил бириктириб, кўп қаватли уйлардан биридаги хонадонни ижарага олгани ва у ерда қалбаки пул тайёрлаш билан шуғуллангани аниқланган.
Тезкор тадбир давомида ижарадаги хонадон кўздан кечирилганда, ярим тайёр ҳолатдаги 100 ва 200 минг сўмлик купюралардан иборат жами 79,8 миллион сўмлик қалбаки пул, «EPSON» русумли рангли принтер, унинг бўёқлари ҳамда канцелярия буюмлари ашёвий далил сифатида олинган.
Қайд этилишича, гумонланувчилар муқаддам ҳам судланган бўлган.
Мазкур ҳолат юзасидан уларга нисбатан Жиноят кодексининг 176-моддаси 2-қисми «в» банди билан жиноят иши қўзғатилган. Айни вақтда тергов ҳаракатлари олиб борилмоқда.
