Ўзбекистон ҳар йили БМТнинг барқарор ривожланиш ечимларини излаш бўйича бўлинмаси томонидан тақдим этиладиган дунёнинг энг бахтли мамлакатлари рейтингида (World Happiness Report) 6 поғона пастлаб, 53-ўринни эгаллади.
Ҳужжатни ишлаб чиқишда экспертлар асосан аҳоли даромадлари, соғлиқ, ижтимоий қўллаб-қувватлаш, бандлик ва коррупция даражаси каби кўрсаткичларни ҳисобга олади. Бундан ташқари, рейтингда мамлакатда фуқаролик эркинликлари, хавфсизлик ва келажакка ишонч ҳисси мавжудлиги, шунингдек, оилаларнинг барқарорлиги кўрсаткичлари ҳам инобатга олинади.
2025 йилда эълон қилинган рейтингда биринчи ўринни Финляндия сақлаб қолди (мамлакат 2017 йилдан бери рейтингда биринчи ўринни эгаллаб келади). Ундан кейин Дания, Исландия, Швеция ва Нидерландия жойлашган. Энг бахтли мамлакатлар ўнталигига Коста-Рика, Норвегия, Исроил, Люксембург ва Мексика ҳам кирди.
Рейтингда Марказий Осиё давлатлари орасида Қозоғистон энг яхши натижани кўрсатди: 43-ўрин (ўтган йилда 49 эди). Қирғизистон 75-ўрин (75). Тожикистон 90-ўринда (88). Туркманистон бўйича маъумотлар кўрсатилмаган.
Рейтингда Германия, Буюк Британия ва АҚШ кетма-кет жойлашган, мос равишда 22, 23 ва 24-ўринлар. Рейтингда жами 147 та мамлакат бор. Сўнгги ўринларни Ливан, Серра-Леоне ва Афғонистон эгаллаган. Шунингдек, Россия 66-ўринда, Украина — 111, Туркия -94.
