Россия Президенти Владимир Путин Ўзбекистон Президенти Шавкат Мирзиёевга Наврўз байрами муносабати билан табрик йўллади. Бу ҳақда Президент матбуот хизмати хабар берди.
“Ҳурматли Шавкат Миромонович! Баҳор айёми Наврўз муносабати билан энг самимий табрикларимни қабул қилгайсиз”, дейилади табрикда.
Шунингдек, табрикда Россия-Ўзбекистон муносабатлари стратегик шериклик ва иттифоқчилик руҳида муваффақиятли ривожланаётгани қайд этилган.
“Биргаликдаги саъй-ҳаракатларимиз билан ўзаро манфаатли икки томонлама алоқаларни бундан буён ҳам дўст халқларимиз фаровонлиги, Марказий Осиёда хавфсизлик ва барқарорликни мустаҳкамлаш йўлида фаол ривожлантирамиз, деб ишонаман. Ушбу қутлуғ айёмда Сизга, муҳтарам Шавкат Миромонович, чин қалбимдан мустаҳкам соғлик ва муваффақиятлар, Ўзбекистоннинг барча фуқароларига эса бахт-саодат ва фаровонлик тилайман”, дейди Путин.
Америка Қўшма Штатлари Президенти Дональд Трамп Ўзбекистон Президенти Шавкат Мирзиёевни Наврўз байрами билан табриклади. Бу ҳақда Президент матбуот хизмати хабар берди.
“Муҳтарам Президент жаноблари! Америка Қўшма Штатлари халқи номидан Сизни ва бутун Ўзбекистон халқини ажойиб Наврўз айёми билан табриклайман. Бу барча учун тинчлик, фаровонлик ва янгиланиш байрамидир”, дейилади хабарда.
Трапм ўз табригида мамлакатлар ўртасида мустаҳкам ришталар ўрнатилаётганини юксак қадрлашини ва Мирзиёевнинг изчил ислоҳотлар дастурини олқишлашини билдирган.
“Савдо алоқаларимизни кенгайтириш ва замонамизнинг энг йирик муаммоларини ҳал этиш йўлида ҳамкорлик қилишни интиқлик билан кутаман. Буюк давлатларимиз равнақ сари интилаётган бир пайтда, Америка Қўшма Штатлари Ўзбекистоннинг суверенитети, мустақиллиги ва ҳудудий яхлитлигини доимо қўллаб-қувватлашга содиқ бўлиб қолади. Наврўз муборак!”, дейилади табрикда.
Хитой Халқ Республикаси Раиси Си Цзиньпин Ўзбекистон Президенти Шавкат Мирзиёевни Наврўз айёми билан табриклади. Бу ҳақда Президент матбуот хизмати хабар берди.
“Муҳтарам Президент жаноблари! Хитой тақвими бўйича Янги йил байрами муносабати билан йўллаган табригингиз учун Сизга самимий миннатдорлигимни изҳор этаман. Ўзбек халқининг анъанавий Наврўз байрами муносабати билан Хитой ҳукумати ва халқи номидан сизга, Ўзбекистон ҳукумати ва халқига самимий табрикларимизни етказмоқчиман”, дейилади табрикда.
Шунингдек, минг йиллик тарихга эга Наврўз баҳор келиши ва табиат уйғонишини ифодалаб, ўзбек халқининг бахтли ҳаётга, эл-юрт бирлигига ва равнақига интилишини акс эттириши таъкидланган.
“Ўтган йил июль ойида Остонада бўлиб ўтган ШҲТ саммити доирасидаги самимий ва дўстона учрашувимизда Хитой-Ўзбекистон муносабатлари ва турли соҳалардаги ҳамкорликни янада ривожлантириш бўйича муҳим келишувларга эришдик, икки томонлама алоқаларнинг янги йўналишларини белгилаб олдик”, дейилади мактубда.
Си Цзиньпин эришилган келишувлар самарали амалга оширилаётгани, икки давлат ўртасидаги ўзаро манфаатли ҳамкорлик изчил мустаҳкамланиб, эътиборга лойиқ натижалар бераётганини мамнуният билан қайд этган.
“Мен Хитой-Ўзбекистон муносабатларини ривожлантиришга катта аҳамият бераман ва яқин дўстлигимизни юксак қадрлайман. Сиз билан биргаликда барча соҳалардаги ҳамкорликни илгари суриш, Хитой ва Ўзбекистоннинг ягона тақдир ҳамжамиятини барпо этиш ишларини бойитиш учун ҳаракат қилишга тайёрман. Фурсатдан фойдаланиб, сизга, Жаноби Олийлари, мустаҳкам соғлик, оилавий бахт-саодат, давлат раҳбари сифатидаги масъулиятли фаолиятингизда муваффақиятлар, дўст Ўзбекистон халқига эса тинчлик-осойишталик, бардавом тараққиёт ва фаровонлик тилайман”, дейилади табрикда.
