Қозоғистон ва Ўзбекистон ўртасидаги учта чегара ўтказиш пунктида электрон навбатни банд қилиш учун 9 ноябрдан бошлаб 86,5 минг тенге (тахминан 2 миллион 261 минг сўм) кафолат пули талаб этилади. Бу ҳақда Туркистон вилояти Давлат даромадлари департаменти маълум қилди.
Янги тартиб «Қозиғурт», «Б. Қонисбаев» ва «Атамекен» чегара ўтказиш пунктларида амал қилади. Кафолат пули миқдори 20 ойлик ҳисоб-китоб кўрсаткичига тенг. Электрон навбатни банд қилишдан олдин ташувчининг махсус электрон ҳисобварағида ушбу маблағ бўлиши шарт.
Белгиланган вақтда чегарага етиб келган ҳайдовчига кафолат пули тўлиқ қайтарилади. Бироқ юк машинаси белгиланган вақтда чегарага келмаса ва бу ҳолат 90 календарь кун ичида икки марта такрорланса, ташувчи кафолат пулидан маҳрум бўлади. Маблағ Қозоғистон давлат бюджетига ўтказилади.
Департаментнинг таъкидлашича, янги тартиб чегара ўтказиш пунктларида сунъий навбатлар юзага келишининг олдини олишга қаратилган.
Шу муносабат билан юк ташувчиларга қатновларни олдиндан режалаштириш ва электрон ҳисобварақларида етарли маблағ бўлишини таъминлаш тавсия этилган.
