АҚШ сенаторлари Россия нефти, гази ва уранини харид қилувчи давлатлар учун 500 фоизлик бож билан таҳдид қилмоқда – The Hill
Агар Россия Украина билан узоқ муддатли тинчлик келишувига рози бўлмаса, Америка сенаторлари Россия энергетик ресурслари ва уранини харид қилаётган давлатлар учун 500% миқдорида божхона тарифини жорий этишни таклиф қилмоқда. Ушбу ташаббус Россия тажовузкорлигини тўхтатиш учун ишлаб чиқилган.
АҚШ Конгрессининг ҳар икки партияси вакиллари Россияга нисбатан "иккиламчи" санкцияларни, хусусан, унинг нефти, гази ва уранини сотиб олаётган давлатлар учун 500% миқдоридаги божни назарда тутувчи қонун лойиҳасини тақдим этдилар. Бу ҳақда The Hill нашри хабар бермоқда.
Ташаббускорлар гуруҳига 50 нафар республикачилар ва демократлар кирган бўлиб, уларга сенаторлар Линдси Грэм ва Ричард Блюменталь етакчилик қилмоқда.
Янги санкциялар Россия нефти, гази, урани ва бошқа товарларини харид қилаётган давлатлар учун тарифларни оширишни кўзда тутади. Қонун лойиҳаси муаллифлари таъкидлаганидек, АҚШ Сенатидаги етакчи фикр шундан иборатки, россия агрессор ҳисобланади ва бу даҳшатли уруш ҳамда Путиннинг тажовузи зудлик билан тўхтатилиши, келгусида эса чекланиши лозим.
Шунингдек, сенаторлар президент Трампнинг Россияга нисбатан тинчлик ўрнатишга доир саъй-ҳаракатларнинг муваффақиятсизлиги борасидаги норозилиги қўллаб-қувватлашларини таъкидладилар.
“1994 йилда Будапешт меморандуми доирасида Украина тахминан 1700 та ядро қуролидан воз кечган, АҚШ, россия ва Буюк Британия эса Украина суверенитетига ҳурмат билан ёндашиш мажбуриятини олган эди. Бироқ бу Россиянинг ҳужумкор агрессиясини тўхтатишга ёрдам бермади”, дея эслатишди сенаторлар.
Сенаторлар 2025 йилда президент Трамп ва унинг жамоаси ўтмишда амалга ошириб бўлмаган вазифани уддалаб, Россия агрессиясини тўлиқ тўхтатиши ва эркин ҳамда демократик Украинанинг мавжудлигини таъминлашига умид билдиришди.
"Россияга қарши ушбу санкциялар тайёр ва агар улар овозга қўйилса, Сенат ҳамда Ваколатлар палатасида икки партия вакилларининг катта кўмагига эга бўлади, ", – дейилади ташаббускорлар хулосасида.
Эслатиб ўтамиз, бундан олдин Россия Ташқи ишлар вазирининг ўринбосари Сергей Рябков АҚШнинг Украинадаги урушни тўхтатиш бўйича таклифларини қабул қилмаслигини маълум қилган эди. Москва бу ғояларни жиддий, бироқ салбий баҳолашини билдириб, АҚШ таклифларини можаронинг асл сабабларини инобатга олмаган схема сифатида баҳолади.
Абдуллоҳ Саййид
