Зеленский Россия билан сулҳ тузиш учун ҳудулар борасида ёнбосишга рози бўлди.
АҚШ тинчлик музокараларидан воз кечмайди, Украина де-факто ҳудудий имтиёзларга рози, деди Келлог. 2025 йил 30 апрель куни АҚШнинг махсус вакили Кит Келлог Оқ уйнинг аввалги таҳдидларига қарамай, Вашингтон тинчлик ўрнатиш уринишларидан воз кечишини кутмаётганини маълум қилди.
"Украиналиклар менга ўтган ҳафта айтишди — улар ўз ҳудудларидан воз кечишга тайёр... бу де-юре эмас, абадий ҳам эмас, де-факто, чунки руслар у ерни амалда эгаллаб туришибди... Улар шунга боришга тайёр", — деди Келлог Fox News телеканалига берган интервьюсида.
АҚШ Украина ва Россия ўртасида тинчлик келишувига эришиш учун саъй-ҳаракатларини кучайтирган. Россия президенти Владимир Путин 28 апрель куни 8 майдан 11 майгача вақтинчалик ўт очишни тўхтатишни эълон қилди, Келлог эса 29 апрель куни бу ташаббусни "абсурд" деб атади. Зеленский ҳам бунга шубҳа билан қаради. “Шунчаки байрамни тинчгина ўтказиб олиш учун ўйлаб топилган маккорлик” деб атади.
Келлогдан Россиянинг Украинага қарши урушини тугатиш бўйича тинчлик музокараларидан АҚШ воз кечишга тайёрми, деб сўралганда, у "Менимча, йўқ", деб жавоб берди.
АҚШ, агар музокараларда силжиш бўлмаса, Украина ва Россия ўртасида ўт очишни тўхтатиш бўйича саъй-ҳаракатлардан воз кечиш билан таҳдид қилган эди.
"Бизда (Украина) рози бўлган 22 та аниқ шарт бор эди. Улар нимани хоҳлашади... ва нимага эга — бу жуда мукаммал ва доимий ўт очишни тўхтатиш, бу эса тинчлик келишувига олиб келади. Мен мукаммал деганимда, денгиз, ҳаво ва қуролли инфратузилмаларни камида 30 кунга тўхтатишни назарда тутяпман... Бу муҳим тинчлик ташаббусига айланиши мумкин", — деди Келлог.
Унинг сўзларига кўра, отишмани тўхтатиш камида 30 кун давом этиши керак, чунки бу АҚШ президенти Дональд Трампнинг қарашларига мос келади.
"Нега 30 кун муҳим? Чунки бу одамларнинг ўлдирилишини тўхтатади. Президент Трамп айнан шуни хоҳлайди", — деди Келлог.
Путин бу ўт очишни тўхтатиш таклифини қабул қиладими, деган саволга жавобан Келлог шундай деди: "Бу унинг ўзига боғлиқ".
"Агар (Путин) чиндан ҳам одам ўлдирилишини тўхтатмоқчи бўлса, агар у бу урушни тугатишни истаса, унинг олдида таклиф қилинган йўл бор", — деди Келлог.
Украина президенти Владимир Зеленский ва Дональд Трамп 26 апрель куни Ватиканда Папа Францискнинг дафн маросимида учрашган. Келлог бу учрашувни ижобий деб баҳолади.
"Менимча, бу жуда ижобий суҳбат бўлди, ҳатто украиналиклар буни менга жуда конструктив деб айтишди", — деди Келлог.
Келлогнинг таъкидлашича, тинчликка эришиш учун АҚШ Россиянинг Украинага қаратилган айрим максималистик талабларига қисман рози бўлиши мумкин.
"Инсонлар бу уруш қанчалик ваҳший бўлганини тўлиқ англамайди. Фақат аскарларни оладиган бўлсак — украин ва рус ҳарбийлари, ўлган ва яраланганлар биргаликда 1,2 миллиондан ошган — бу даҳшатли рақам", — деган Келлог.
АҚШ, Буюк Британия, Германия, Франция ва Украина расмийлари 23 апрель куни Лондонда Россия-Украина урушига барҳам бериш бўйича йўл харитасини муҳокама қилиш учун учрашди.
Украина АҚШ таклиф этган тўлиқ 30 кунлик отишмани тўхтатишга 11 март куни розилик билдирган, агар Россия ҳам рози бўлса, Киев тайёр эканини маълум қилган. Москва эса ҳозирча бу шартларни қабул қилгани йўқ.
Зеленский бир неча бор тўлиқ 30 кунлик отишмани тўхтатишга чақирган. 23 апрель куни у "Украина зудлик билан, тўлиқ ва шартсиз оташкесим ўрнатишни талаб қилади", дея баёнот берган эди.
Абдуллоҳ Саййид
