Turkish Airlines авиакомпанияси йўловчиларини самолёт тўлиқ тўхтамасдан ўрнидан тургани учун жаримага тортади. Бу ҳақда “Haber Gazetesi” хабар берди.
Маълум қилинишича, эндиликда Туркия авиакомпанияси йўловчилари самолёт тўлиқ тўхтамасдан ва хавфсизлик камарларини ечиш белгилари ўчирилмасдан ўрнидан турса, улар маъмурий жаримага тортилиши мумкин. Ушбу чора-тадбирлар кучга кирди ва Turkish Airlines ушбу ўзгариш ҳақида борт экипажини огоҳлантирди.
Янги тартибга биноан, экипаж хайрлашув эълонидан сўнг ҳам йўловчиларни хавфсизлик камарини ечиш белгиси ўчмагунча жойларидан турмасликка огоҳлантириши лозим.
“Тижорат рейслари давомида бериладиган йўловчи эълонларига киритилган ўзгартиришлар бортда чекувчиларнинг, шунингдек, самолёт тўлиқ тўхтамасдан ва хавфсизлик камари белгилари ўчирилмасдан ўрнидан турувчиларнинг тартибни бузишининг олдини олишга қаратилган. Ушбу чораларнинг мақсади – йўловчилар орасида тартиб ва хабардорлик даражасини ошириш”, дейилади хабарда.
Turkish Airlines'га кўра, эндиликда, самолёт тўлиқ тўхташидан олдин ўрнидан турганлар, юк жавонларини очганлар ёки экипаж кўрсатмаларига зид ҳаракат қилганлар ҳам қоидабузар ҳисобланади ва уларга нисбатан маъмурий чоралар кўрилади.
Хабарга кўра, ушбу чораларни қўллашдан мақсад бахтсиз ҳодисаларнинг олдини олиш.
