Киев халқаро социология институти (KXSI) томонидан 23 июлдан 4 августгача ўтказилган сўровномага кўра, украиналикларнинг 58 фоизи президент Владимир Зеленскийга ишонишини билдирган. 35 фоиз ишонмаслигини айтган, 7 фоиз эса жавоб беришга қийналган.
Бу аввалги сўров натижаларига нисбатан пасайишдир. 15 майдан 3 июнгача ўтказилган олдинги сўровда Зеленскийга ишонч 65 фоиз, ишончсизлик эса 30 фоиз бўлган.
Таҳлилчилар фикрича, ишончнинг пасайишига Украинада коррупцияга қарши кураш муҳим омил бўлган. Сўров иштирокчиларининг 21 фоизи айнан коррупцияни асосий сабаб деб кўрсатган.
Яна 20 фоиз фуқаролар уруш билан боғлиқ муаммоларни, 10 фоиз эса президент атрофидаги жамоанинг фаолиятини салбий баҳолаган.
Шунингдек, 9 фоиз респондент Зеленскийга етарли сиёсий тажриба етишмаслигини айтган, яна 9 фоизи эса у сайловолди ваъдаларини бажармаган деб ҳисоблайди.
Қайд этиш жоизки, сўровнома Украина парламенти коррупцияга қарши тузилмалар — NABU ва SAP мустақиллигини чекловчи қонунни қабул қилганидан кейин бошланган.
Кейинги куни Зеленский парламентга бу тузилмалар мустақиллигини таъминлашга доир бошқа қонун лойиҳасини тақдим этган эди.
