Ўзбекистонлик моҳир актёр, режиссёр, ҳажвий қўшиқлар ва сўз устаси Шерқўзи Ғозиев 75 ёшида вафот этди. Бу ҳақда бугун, 26 сентябрь куни Маданият вазирлиги хабар берди.
Маълум қилинишича, Шерқўзи Ғозиев 1950 йилнинг 8 май куни Фарғона вилояти Бувайда тумани Чиркай қишлоғида таваллуд топган. Тошкент политехника институтининг қурилиш факультетини тамомлаган.
1971 йилда Йўлдош Охунбобоев номидаги Ёш томошабинлар театрига актёр сифатида ишга таклиф этилган. Шу йили Островский номли институтининг актёрлик бўлимига сиртдан ўқишга кириб, 1976 йили муваффақиятли тугатган. 1970 йилдан “Телеминиатюралар театри”да роллар ижро этишни бошлаган. Санъатга қизиқиш уни Ўзбек давлат филармониясига етаклаган ва 1978 йилдан филармонияда ишлай бошлаган.
1990 йилда Ўзбекистон ва Ҳиндистон ҳамкорлигида суратга олинган “Чангалзор қироли” фильмида зоотехник ролини ижро этган. Шундан сўнг, 1992 йилдан “Шерхан” студиясини очиб, ҳиндлар билан ҳамкорликда 2006 йилда “Шерхан тракторчи” кинокомедияси, 2008 йилда “Ёлғиз эмассан” мелодрама фильмларини тасвирга олган.
