Ўзбекистонда хизмат кўрсатган ирригатор, аграр ва сув хўжалиги соҳасида кўп йиллик меҳнати билан танилган Исмоил Жўрабеков 94 ёшида вафот этди. У 1931 йил 12 сентябрда Самарқанд вилоятида туғилган.
Исмоил Жўрабеков 1990-йиллар ва 2000-йиллар бошида мамлакат аграр секторида етакчи лавозимларда ишлаган. Жумладан, у 1994–1998 йилларда бош вазир ўринбосари – қишлоқ ва сув хўжалиги вазири, 2000–2004 йилларда эса Президентнинг аграр масалалар бўйича давлат маслаҳатчиси сифатида фаолият юритган.
Узоқ йиллик танаффусдан сўнг 2021 йилда Сув хўжалиги вазири маслаҳатчиси сифатида давлат хизматига қайтганди.
Исмоил Жўрабеков фаолияти давомида бир қатор олий мукофот ва унвонлар билан тақдирланган, жумладан, “Меҳнат шуҳрати”, “Эл-юрт ҳурмати”, “Буюк хизматлари учун”, “Фидокорона хизматлари учун” каби орденлар соҳиби бўлган.
