24 сентябрь куни Тошкент вилоятининг Пискент, Бўка, Бекобод, Қуйичирчиқ ва Оққўрғон туманларидаги бир нечта мактабгача таълим муассасаларида болаларнинг заҳарланиш ҳолатлари қайд этилди. Ҳолат юзасидан Бош прокуратура расмий баёнот берди.
Маълум қилинишича, бир нечта аутсорсинг хизматини кўрсатувчи хусусий корхона масъул шахсларига нисбатан Жиноят кодексининг 257-1-моддаси 1-қисми (сифатсиз озиқ-овқат маҳсулотлари етказиб бериш) бўйича жиноят иши қўзғатилиб, ҳозирда дастлабки тергов ҳаракатлари олиб борилмоқда.
Жиноят иши Бош прокуратура томонидан назоратга олинган бўлиб, Бош прокурорнинг биринчи ўринбосари Баҳодир Валиев бошчилигида махсус ишчи гуруҳ тузилган. Тергов давомида аутсорсинг корхоналари озиқ-овқат етказган барча МТТ тарбияланувчилари тиббий кўрикдан ўтказилмоқда.
Расмийларга кўра, ҳозирда тиббий ёрдам кўрсатилган болалар орасида оғир аҳволдагилар йўқ, ҳолат шифокорлар назоратида.
Шунингдек, бу каби ҳолатларнинг олдини олиш мақсадида барча давлат мактабгача таълим муассасаларига озиқ-овқат маҳсулотлари етказиб берилиши ҳолати бўйича кенг қамровли текширув ишлари бошланган.
Тергов якунлари бўйича қўшимча маълумотлар оммавий ахборот воситаларида эълон қилиниши режалаштирилган.
