Давлат хавфсизлик хизмати ва ички ишлар органлари ҳамкорлигида Сирдарё ҳамда Наманган вилоятларида ўтказилган тезкор тадбирлар давомида гиёҳвандлик воситалари тайёрловчи ва сотувчи гуруҳлар фаолияти тўхтатилди.
ДХХ ва ИИВ ходимлари Сирдарё вилоятидаги тезкор тадбир вақтида Гулистон шаҳрида фаолият юритган нарколабораторияни аниқлади. У ерда 1995–1996 йилларда туғилган уч нафар фуқаро синтетик “Мефедрон” моддасини тайёрлаб, “закладка” орқали сотиб келгани маълум бўлди.
Тинтув вақтида 4 кг 373 грамм “Мефедрон”, электрон тарози, миксер, противогаз ва қадоқлаш воситалари ашёвий далил сифатида олинди. Тергов маълумотларига кўра, улар хориждан юборилган хом-ашёлардан фойдаланган. Ҳозирда мазкур шахсларга нисбатан Жиноят кодексининг 273-моддаси 5-қисми билан иш қўзғатилган.
Шунингдек, Наманган вилоятида ДХХ, ИИВ, Божхона ва Чегара қўшинлари ҳамкорлигидаги тадбирда Учқўрғон туманида яшовчи фуқаро 9 кг 702 грамм “гашиш” моддаси билан ушланди. У Қирғиз Республикасидан мамлакат ҳудудига қонунга хилоф равишда кириб келган пайтда тўхтатилган. Ҳозирда унга нисбатан Жиноят кодексининг 223 ва 246-моддалари бўйича иш қўзғатилган.
Бошқа ҳолатда, Наманган шаҳрида 1990 йилда туғилган фуқаро контрабанда йўли билан кириб келган, умумий қиймати 3,2 млрд сўмдан зиёд бўлган кучли таъсир қилувчи дори воситалари ва контрафакт маҳсулотларни қабул қилиб олган вақтда қўлга олинди.
Тезкор тадбир натижасида Наманган ва Косонсой туманларидаги яна беш нафар шахс аниқланди — улар кучли таъсир қилувчи дориларни Фарғона водийси ва Тошкентда сотиш билан шуғулланган. Барча ҳолатлар бўйича жиноят ишлари қўзғатилиб, тергов ҳаракатлари давом этмоқда.
