ДХХнинг Наманган вилояти бўйича бошқармаси, Чегара қўшинлари ва ИИО ходимлари ҳамкорлигида ўтказилган тезкор тадбирда Андижон шаҳрида яшовчи икки нафар фуқаро “ўзбек-қирғиз” давлат чегарасининг Уйчи тумани ҳудудидан ўтаётган вақтида тўхтатилди.
Текширув натижасида уларнинг юк сумкасидан 19 кг 169 грамм “гашиш” моддаси аниқланиб, ашёвий далил сифатида олинди. Кейинчалик наркотикни олиб кетиш учун келган яна бир ҳамшаҳари ҳам қўлга олинди.
Шунингдек, яна бир тезкор тадбирда Янги Наманган туманида яшовчи, муқаддам судланган аёл Марғилондан юборилган 1 кг 953 грамм “гашиш”ни қабул қилиб олаётган вақтида ушланди.
Ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
